Kesa bi nameyê Hîcran Berna Ayverdîya ke Nisêbînî de ameybî tepiştene û cezaya muebeto giran aye rê ameyêne waştene, 11 rojî verê weçînayîşî serê hemşaredar Selçuk Mizrakli û 4 rojî verê weçînayîşî zî serê hemşaredare Kezîban Yilmaze de îfade dabî. Vejîya raşte ke dewleta ke Ayverdîye rê cezaya muebetî waştêne 5ê êlule de ‘Tu sucêk nêame vînayen’ Ayverdîye serbest vera daye
Kesa bi nameyê Hîcran Berna Ayverdîya (46) ke Nisêbînî de bi sucdarîya ‘Yewî û yewbîyayîşê welat xera kena’ ameyêne muhakemekerdene û cezaya muebeto giran aye rê ameyêne waştene. Ayverdîye Zîndanê Cinîyan yê Kayserî de ameyêne tepiştene. Ayverdîye 11 rojî verê weçînayîşî serê Hemşaredar Şaredarîya Bajarê Girdî yê Amedî Selçuk Mizrakliyî û 4 rojî verê weçînayîşî zî serê hemşaredare Kezîban Yilmaze de îfade dabî. Ayverdîye îfadeyo ke daye dozgerîye de îdîa kerde ke Mizrakli ‘endamêk rêxistine derman kerdo’ û Yilmaze zî ‘Komîsyonê rêxistine yê rêxistine de ca gêna.’ Vejîya raşte ke dewleta ke Ayverdîye rê cezaya muebetî waştêne 5ê êlula 2019î de roniştişê doze yê 4. Mehkemaya Cezaya Giran ya Mêrdînî de ‘Tu sucêk nêame vînayen’ Ayverdîye serbest vera daye.
Îdîanameyê doze de ame dîyarkerdene ke wextê qedexeyê tebervejîyayîşê kuçeyan yê Nisêbînî de 26ê Gulana 2016î de raşteyê Tunçî yê taxa Yenîşehîrî de tewrê 42 kesan ‘teslîm’ bîya. Ame dîyarkerdene ke Ayverdîye 4 rojan binê çiman de menda û gama ke ‘teslîm’ bîya zî tu çîyêko biba delîlê sucî nêameyo vînayene.
‘Fotograf teşhîs kerda’
Mehkema îdîaname de vana ke Ayverdîye anestezîst a û seba ke betal bîye, bi pêşnîyaza embaza xo şîya Nisêbîn û ewja de bi îdîayê ‘Endamanê rêxistine’ derman kerda, ameya tepiştene. Îdîaname de ame dîyarkerdene ke Ayverdîye binê çiman de fotografê ke nîşanê aye ameyî nawitene teşhîs kerda û cok ra îfade daya.
3 serrî ra dima îfade daye
Ayverdîya ke ‘Qanûnê Poşmanîye’ ra feyde girewta, îfadeyê xo yê asayîşî, dozger û mehkema de tu hawayî serê Mizrakli û Yilmaze de îfade nêdaya. Labelê 3 serrî badê tepiştişê xo, 11 rojî verê weçînayîşî serê Mizrakli û 4 rojî verê wçînayîşî zî serê Yilmaze de îfade daya. Mizrakli û Yilmaze îfadeyê Ayverdîye dera 21ê teşrîna verêne de ameyî tepiştene û 22ê teşrîna verêne de zî bi îdîayê ‘Endamîya rêxistine’ ametî tewqîfkerdene. AMED
