HSD’ê bi daxuyaniyekê ragihand ku leşkerên dewleta tirk û çeteyên wê li gelek deveran bi çekên giran êrîşî hêzên wan kirin. HSD’ê daxuyand ku di encama bersivdayîna hêzên wan de herî kêm 29 çete hatin kuştin û gelek çete jî birîndar bûne
Navenda Ragihandin û Çapemeniyê ya Hêzên Sûriyeya Demokratîk (HSD) têkildarî encamê 17’emîn roja Berxwedana Rûmetê daxuyaniyeke nivîskî bi raya giştî re parve kir.
Daxuyaniya HSD’ê ya têkildarî mijarê wiha ye:
“SERÊKANIYÊ
* Artêşa tirk a dagirker û çeteyên wê bi piştgiriya balafirên bêmirov û çekên giran êrîşî gundên Menacir, Esediyê, Leylan û Bîr Nûh ên li başûrê Serêkaniyê kirin. Hêzên me jî di çarçoveya xweparastinê de bersiv dan êrîşan û şerên dijwar rû dan. Di encama şer de herî kêm 10 çete hatin kuştin, gelek çete birîndar bûn, panzêrek û seyareyeke doçkabarkirî jî hatin rûxandin.
AMÛDÊ Û DIRBÊSIYÊ
* Artêşa tirk a dagirker û çeteyên wê êrîşî gundê Derdarayê kir. Li ser bersivdayîna hêzên me jî êrîşên dagirkeran hatin şikandin.
KOBANÊ Û EYN ÎSA
* Artêşa tirk a dagirker û çeteyên wê bi çekên giran û bi koordîneya balafirên keşfê, êrîşî gundên Çelbê, Dibis û gundewarên bakurê Eyn Îsayê, Xirbet Faria, Mitmeşrak û Evdikê Biçûk kirin. Li ser bersivdayîna hêzên me jî li herêmê şer qewimî.
* Di encama bersivdayîna hêzên me de êrîş hatin şikandin û bi qasî ku hate zelalkirin, 19 çete û leşker hatin kuştin. Her wiha gelek jî birîndar bûn. Dîsa li vê herêmê 2 panzêr hatin rûxandin û yek jî hate derbkirin.
* Bi giştî di encama bersivdayîna hêzên me de herî kêm 29 çete hatin kuştin, hejmarekê zêde ya çeteyan birîndar bûn, 4 seyareyên leşkerî hatin rûxandin û yek jî hate derbkirin.
* Di vê berxwedanê de hevalekê me jî bi lehengî şer kir û şehîd bû û 11 hevalên me jî birîndar bûn.”
