Heyva Sor a Kurd domana bi nameyê Saraya ke 10ê Teşrîna Verêne de netîceyê hêrişanê artêşa tirkî ya dagirkere û çeteyanê girdayeyê aye de çaqeyê aye birîyabî, seba tedawî erşawit başurê Kurdistanî
Artêşa tirkî ya dagirkere û çeteyanê girdayeyê aye 10ê Teşrîna Verêne de taxanê Qamişlo (Zeytûniyê, Xerbî, Bişêriyê û Qudûrbeg) ke sivîl tede cuyayêne bombardûman kerdî. Netîceyê bombardûmanê artêşa tirkî ya dagirkere û çeteyanê girdayeyê aye de domanê bi nameyê Mihemed Yûsif Mihemed (12) û cinîya binameyê Beşîra Kibşo şehîd bîyî. Sewbîna Cangîn Ehmed Mûrad (35), Abdullkerîm Ebid (23), Delîl Abdullmecîd Elî (26), Bedran Rakan Mihemed (35), Mehmûd Ehmed Hemadî (19), Hamid Hewas Umer (40), Delîl Abdullmecîd Elî (23) û Kanîwar Beşîr Elî (24) zî birîndar bîyî. Domana bi nameyê Saraye (7) zî netîceyê hêrişanê artêşa tirkî ya dagirkere û çeteyanê girdayeyê aye de birîndar bîye û çaqeyê xo vindî kerde. Çaqeyê Saraye yê raştî corê kapikî ra ame birnayene. Saraye waya şehîd Mihemed Yûsif Mihemedî ya.
Bi hemkarî û koordînasyonê Rayîrberîya Xosere ya Vakur Rojhelatê Sûrîye, Heyva Sor a Kurd ewro domana bi nameyê Saraya Yûsife, dayîk û pîyê aye seba tedawî erşawit başûrê Kurdistanî.
Kadroyê Heyva Sor a Kurdî dîyar kerdî ke domana bi nameyê Saraye do rayîrê berê Sêmalka ra derbazê başurê Kurdistanî biba. QAMIŞLO
