Leşker û çeteyên dewleta tirk depoyên genim û ceh ên li Girê Spî şêlandin. Hat zanîn ku hêzên dagirker zêdetirî 48 hezar û 400 tonên ceh û genim dizî ne
Artêşa tirk a dagirker û çeteyên wê kiryarên derqanûnî li herêmên ku dagir dike, dikin. Çeteyan hemû navendên xizmetguzariyê û milkên sivîlan dagir kirin û talan kirin. Têkildarî mijarê berpirsê depoyên genim ên li Girê Spî Şêx Mihemed Ebdo anî ziman ku artêşa tirk a dagirker û çeteyên DAIŞ’ê yên vegeriyane bajêr, depoyên El Dehlîz ê (11 hezar û 400 tonên gehim tê de bûn) ên li rojhilatê bajarokê Silûkê û depoyên genim ên El Sexrat ê li başûrê Girê Spî (11 hezar ton genim) talan kirin.
Bi vê yekê re jî artêşa tirk a dagirker û komên çete yên girêdayî wê ji roja destpêkê ya êrîşa dagirkeriyê ve, li Girê Spî zêdetirî 48 hezar û 400 tonên ceh û genim ên Girê Spî dizîn. Ebdo got ku wan ceh û genim piştî demsalê bi 160 lîreyên Sûriyeyê kirîn û berhemên genim û ceh ên di depoyan de ji bo sal û nîvekê têra herêmê dikir.
Bi şev depo şêlandin
Ebdo bi lêv kir ku çeteyan li nêzî depoyên El Dehlîzê li rojhilatê bajaroka Silûkê rêyeke taybet vekirin da ku genim bidizin û bibin Tirkiyeyê. Hat zanîn ku çeteyan depo di derengiya şevê de talan kir. Her wiha çeteyan gef li berpirsên depoyan Şêx Mihemed Ebdo û malbata wî xwar ku dê wan bikujin û piştre jî mala wan şewitand.
Malên xebatkarên Rêveberiya Xweser şewitandin
Bi berdewamî jî Ebdo daxuyand ku çeteyan malên her kesên di Rêveberiya Xweser de xebitîne şewitandine û gefên kuştinê li wan xwarine. Weke ku tê zanîn li kantona Girê Spî 4 depoyên genim û ceh hene. Yek ji van li El Dehlîz ê Silûkê, yek li El Sexrat a Girê Spî, yek li Eyn Îsayê û mezintirîn depo ya kantonê ango ya Şirakrikê jî li Girê Spî ye. Ev depo ji hêla artêşa tirk ve hatibûn bombebarankirin. GIRÊ SPÎ
