HDP’iyan diyar kir ku tayînkirina qeyûman bûye rêbazeke rêveberiya hikûmeta AKP’ê û gotin ku bi tayînkirina qeyûman re gel tecrîd dikin
Bi biryara Wezareta Karê Hûndir, qeyûm tayînê 3 Şaredarên Bajarên Mezin, şaredarên bajarekê û 8 navçeyên di bin rêveberiya HDP’ê de hatin kirin û 13 hevşaredar jî hatin girtin. HDP’iyên li Wanê bertek nîşanî tayînkirina qeyûman dan û diyar kirin ku divê ew li dijî bêhiqûqiyên li ser vîna gelê kurd derkevin û vê bêhiqûqiyê qebûl nekin.
Hatîce Kiye anî ziman ku desthilatdariya AKP’ê tayînkirina qeyûman kiriye rêbazek rêveberiya xwe û wiha got: “Ev cara duyemîne qeyûm tayînê şaredariyên me dikin. Ev xespa vînê ye. Bi vê keda jin, ciwan û hemû gel tune hesibandin. Lê gelê kurd tu carî dest ji têkoşîna xwe berneda. Ligel hemû polîtîkayên cihekarî û teslîm girtinê jî, gelê kurd bi tu awayî gav paş ve ne avêt. Gelê kurd wê van jî derbas bike û tim xwedî vîna xwe derkeve.”
Bêdengiya muxalefetê rexne kir
Îbrahîm Acar tayînkirina qeyûma weke tecrîdkirina gel nirxand û ev tişt anî ziman: “Ev pêkanîn dijqanûnî ye. Partiyên muxaletefê li dijî qeyûman bêdeng man. Em wan rexne dikin.”
Zubeyde Ozalp jî da zanîn ku tayînkirina qeyûman li dijî pergala hevserokatiyê ye û wiha axivî: “Gelê kurd li dijî qeyûma serî rakiriye. Pergala hevserokatiyê ji bo jinan pergalek pir girîng e. Em ê vê pergala xwe ya hevserokatiyê û vê pîvanê biparêzin.”
‘Wê deme hilbijartinê nekin’
Ferfîn Kaya da zanîn ku tayînkirina qeyûman li dijî mafê mirovan e û wiha bertek nîşan da: “Wê demê çima mafê hilbijartinê didin mirovan? Bila hilbijartinê nekin. Ger sibe jî hilbijartin çêbe, ez ê dîsa deng bidim vîna xwe.”
Her wiha Kenan Kanat jî destnîşan kir ku hikûmeta AKP’ê şaredariyan weke rantê bikar tîne û wiha got: “Qeyûman bizmarek jî li vî bajarî nexistin. Di ser de jî bi milyonan deyn li dû xwe hiştin. Ez van pêkanînan heya nefesa xwe ya dawiyê jî qebûl nakim. Em ê têkoşîna xwe ya li dijî qeyûman, tim dewam bikin.” WAN
