Temsîlkaro taybet yê DYEyî yê verî yê têkoşînê vera DAIŞî Brett MecGûrk babeta kîştişê serçeteyê DAIŞî El Bexdadî de destnîşan kerd ke tayê çî estê ke ganî Tirkîya îzah bikera
Fermandarê Pêroyî yê Hêzê Sûrîyeya Demokratîke (HSD) Mazlum Abdî zî derheqê kiştişê serçeteyê DAIŞî, qetilkar û sebebê remnayîşê bi hezaran cinî û domanan Bexdadî de dîyar kerdbî ke badê îstîxbaratê 5 aşmî verê, bejahî de dest bi xebata îstîxbaratî kerdî û operasyonêko hempar de heta ke terorîst Ebu Bekîr El Bexdadî werte ra ame wedarnayene ê bêmaben ci taqîp kerdî.
Serekê Dewletê Yewbîyaye yê Amerîka (DYA) Donald Trumpî Qesra Spî de derheqê kiştişê serçeteyê DAIŞî Ebubekir El Bexdadî de eşkerayî dabî çapemenî. Trumî eşkerayîya ke dabî de dîyar kerd ke Bexdadî yêlegêko xokiştişî xo ser de teqnayo û tewrê xo 3 domananê xo tunelêk de kişto.
Ajansê Xeberan yê Reutersî xeberêk pare kerd û dîyar kerd ke Bexdadî wexto ke remayêne Sînorê Tirkîya ameyo kiştene. Reutersî da zanayene ke serçeteyê DAIŞî Ebubekir El Bexdadî wexto ke Idlib ra remayêne Tirkîya 5 kîlometre nizdîyê sînorê Tirkîya de dewa Barishayê de ame kiştene. Temsîlkaro taybet yê DYEyî yê verî yê Têkoşînê vera DAIŞî Brett MecGûrkî operasyonê kîştîşê serçeteyê DAIŞî Ebû Bekir El Bexdadî Washîngton Postî rê nirxna.
Çira Îraqî yan zî rojhilatê Sûrîye de nêbî, Îdlîbî de bî?
McGûrkî bal anit operasyonê kîştişê serçeteyano ke bi tewrêcibîyayîşê HSDyî ameyo kerdene û ard vîrî ke Bexdadî herêma ke tena çend kîlometre sînorê Tirkîya ra dûrî ya de ame kîştene. McGûrkî vat “taye çî estê ke ganî Tirkîya îzah bikera” û destnîşan kerd ke Bexdadî Rojawanê Iraqî yan zî bejayîya Rojhilatê Sûrîye de ke piştîdayoxê xo estê de nîyamo dîyene la Îdlîbî de ameyo dîyene.
‘Pê Tirkîya nêno bawerkerdene‘
Brett McGûrkî ard ziwan ke dewa ke Bexdadî tey ameyo kîştene yew herême de ya ke no demeko derg o ke bi noqtayanê ewnayîşî yê Tirkîya êna pawitene û dîyar kerd ke Încîrlîk ra destpêkerdişê oparasyonî girîng û manedar o. McGûrkî destnîşan kerd ke na yewe nîşan dana ke DYE hevalbendê xo yê NATOyî Tirkîya ra bawer nêkeno.
Brett McGûrkî destnîşan kerd ke Îdlîb ‘ceneto tewr pîl yê terorîstan’ o û ard vîrî ke Îdlibî de nêzdîye 40 hezar çeteyî estê ke zafêrîyê înan Tirkîya ra derbazê herême bîyê. McGûrkî dîyar kerd ke herême de şaxê El Qaîdeyî yê Sûrîye estê û ard ziwan ke herême de bazirganîya pîle ya sînorî esta û mabênê çeteyanê ke Tirkîya piştîgîrîya înan kena de têkilîyê menfatî estê.
‘Cayê Tirkîya de HSD reyde hemkarîye ameye kerdene‘
McGûrkî reyna nuşteyê xo de dîyar kerd ke Bexdadî yo ke sey terorîst dinya de tewr zêde ci ra ameyêne gêrayene, na herêma winasîye de mend û destnîşan kerd ke babeta îstîxparatî de pê Tirkîya bawerî nêna kerdene. McGûrkî destnîşan kerd ke na yewe ra serkewte seba îstîxparatî hetkarîye HSDyî ra ameya waştene.
