Vejîya raşte ke mabenê Tayyîp Erdogan û Ebûbekîr El Bexdadî de raşte raşt Serekê Daîreya Xebatanê Taybet yê MÎTî Kemal Eskîntan qasidî kerdo. Sewbîna Bexdadî çend reyan derbazê qezaya Reyhanli ya Tirkîya zî bîyo
Serçeteyê DAIŞî Ebûbekîr El Bexdadî 27ê Teşrîna Verêne de netîceyê operadyonêko hempare yê hêzê HSD û DYA de serê sînorê Hatayî ke binê kontrolê dewleta tirkî de yo de ame kiştene. Hêzê Sûrîyeya Demokratîke (HSD) da zanayene ke aşmî yo ke operasyon dewam keno û ame vatene ke Bexdadî wexto ke waşto derbazê hetê Tirkîya bibo ameyo kiştene.
Derheqê kiştişê serçeteyê DAIŞî Ebûbekîr El Bexdadî de munaqeşe dewam kenî û xeberê newe vejîyenî raşte. Goreyê xebera malpera Cigêrayîşî qasidê mabenê serekê Pêroyî yê AKPyî Tayyîp Erdoganî û Ebûbekîr El Bexdadî serekê MÎTî Hakan Fîdan û keso bi nameyê Kemal Eskîntanî ke no kes zî serekê Daîreya Xebatanê Taybet yê MÎTî yo û eynî wext de zî serçeteyêk tirkî yê teqawitî yo.
Çend reyna ameyo qezaya Reyhanli
Bexdadî dewa Barîşî ke 5 kîlometre dûrê sînorê qezaya Reyhanli ya pabesteyê Hatayî yo û na dewe û herême eynî wext de binê kotrolê dewleta tirkî de ya. Bexdadî verê ke bêro kiştene bi hetkarîya Kemal Eskîntanî derbazê Reyhanli bîyo.
Kemal Eskîntanî cebilxane çeteyanê DAIŞî rê erşawiyo
Sewbîna wexto ke çeteyê DAIŞî hêrişê Kobanê û herêmanê bînan yê Rojawanî kerdî, raşteraşt Kemal Eskîntanî cebilxane çeteyanê DAIŞî rê erşawiyo. Goreyê xeberanê ke vejîyayî raşte çeteyê ke Tirkîya ra derbazê Sûrîye byêne bi hetkarîya MÎTî ameyêne derbazkerdene. Xeylê reyna ame belgekerdene ke dewleta tirkî cebilxane çeteyanê DAIŞî rê erşawita.
Hewl da ke Bexdadî bixelisno, labelê nêbî…
Kemal Eskîntanî hetkarî kerdêne ke Erdogan û Bexdadî yewbînan reyde têkilî bironî. Badê ke DAIŞ derbê giranan werd dewleta tirkî hewl daye ke hemkarê xo Bexdadî bixelisna û bîyara Tirkîya de binimna.
Nameyê kod Ebû Fûrkan o û çalakîyanê vera fermandaranê YPGyî organîze keno
Kemal Eskîntanî badê ke leşkerî ra teqawit bî serra 2010î de sey Serekê Daîreya Pawitişî yê MÎTî de dest bi kar kerd. Eskîntan serra 2014î de bî Serekê Daîreya Operasyonanê Taybet û serra 2017î de bî Hetkarê Musteşarê Xebatanê Taybet û hema zî wezîfeyê xo domneno. Eskîntanî çalakîyanê DAIŞî yê vera fermandaranê YPGyî û çalakîyanê bînan organîze keno nameym kodî yê ci Ebû Fûrkan o.
Endamanê taybet yê Erdoganî yê bi nameyê SADATî perwerde keno
Mabenê Eskîntan û îstîxbaratê Îranî de demanê verênan ra nata têkilîyêka lêşin esta. No şexsîyet eynî wext de Iraq û Sûrîye de programanê perwerdeyîya endamanê artêşa taybet yê Tayyîp Erdoganî yê bi nameyê SADATî hadre û perwerde keno.
