Zarokên Serêkaniyê yên ji ber şer koçber bûn bertek nîşanî êrîşan dan. Zarokek wiha dibêje: “Erdogan kesekî pir xirab e. Ez dixwazim hemû bizane ku Erdogan kesekî nebaş e. Dixwaze zarokan û sivîlan qetil bike.”
Ji ber êrîşan qirkirin û dagirkeriyê yên dewleta tirk û komên çete yên girêdayî wê yên li dijî rojavayê Kurdistanê, bi sedhezaran welatiyên kurd, ereb, suryan, ermen û hwd. ji Serêkaniye û Girê Spî koçberî herêmên din ên rojavayê Kurdistanê bûn. Ji van welatiyan gelek jê jî zarok in. Zarokên ku ji welat û jiyana xwe ya asayî bûn, daxwazên xwe bi ANHA’yê re parve kirin.
Yek ji van zarokan Husên Elî di serî de pirsa ‘Erdogan ji me çi dixwaze’ dike û wiha dibêje: “Em di mala xwe de bûn û diçûn dibistana xwe. Em gelek kefyxweş bûn. Lê bi sedema wî em koçberî Hesekê bûn û bajarê me wêran bû.”
Bang li cîhanê kirin
Zarok Şivan Omer jî got ku dewleta tirk bi balafiran êrîşî bajarê wan kir û wiha dom kir: “Ez dixwazim ev şer bisekine û aramî vegere herêmên me.” Ji zarokan Xemlîn Ehmed a 8 salî jî diyar kir ku li Serêkaniyê şer, tirs û qetilkirina zarokan çêbû. Xemlîn berteka xwe wiha tîne ziman: “Erdogan kesekî pir xirab e. Dixwazim ji hemû cîhanê re bibêjim ku Erdogan kesekî nebaş e. Armanca wî rûxandina malan, qetilkirina sivîlan û talankirin milkên xelkê ye.”
‘Erdogan dixwaze bi şer mala me dagir bike’
Zaroka bi navê Nesrîn Remedan a 9 salî jî wiha got: “Erdogan dixwaze bi şer dest dane ser mala me. Em li bajarê xwe kêfxweş bûn. Ez dixwazim şer raweste û vegerim mala xwe. Dixwazim Erdogan û artêşa wî ji herêmên me derkevin.” HESEKÊ
