HSDyî bi eşkerayîyêke netîceyê şer û pêrodayîşanê 24 saetan eşker kerd. Eşkerayîya HSDyî de ame dîyarkerdene ke hêzê dagirkerî her çiqas ke adirbirnayîş bibo zî hêrişanê xo domnenî û hêzê înan zî çarçeweya xopawitişê meşrû de cewab danî hêrişan. HSDyî da zanayene ke mîyanê 24 saetanê peyênan de xeylê çeteyî ameyî kiştene û birîndarkerdene
Merkezê Resnayîşî yê Hêzê Sûrîyeya Demokratîke (HSD) derheqê şer û pêrodayîşanê mabenê hêzanê înan û hêzanê dagirkeran yê dewleta tirkî û çeteyê girêdayeyê aye yê dewa Zîrgan, Girê Spî û Kobanê de eşkerayîyêka nuştekî da. HSD da zanayene ke her çiqas ke adirbirnayîş bibo zî dagirkerî hêrişanê xo domnenî û hêzê înan zî çarçeweya xopawitişê meşrû de cewab danî hêrişan.
Eşkerayîya HSDyî wina dewam kerd:
“CEPHEYÊ ZÎRGANÎ
* Artêşa dagirkere 50 neqlan dormeyê dewanê Eyn El Hewa û Xirbet Cimoye de waşte ke hêrişê cepheyanê hêzanê hukmatê Sûrîye û dewanê teberê adirbirnayîşî bikera û dagir bikera. Hêzê ma çarçeweya pawitişê dewan de cewab dayî hêrişan û şer qewimîya. Netêceyê şero de qewimîya de herême û dewa Til El Werdî de hûmarêka zêde çeteyî ameyî kiştene û birîndarkerdene. Sewbîna wesayîtêk karî zî ame derbkerdene.
CEPHEYÊ GIRÊ SPÎ Û KOBANÊ
* Artêşa dagirkere û komê çeteyan bi hûmarêka zêde û paştîdayîşê hêzê hewayî hêrişê dewanê Evdikê, Çariqlî û Berberîyê kerdî û hewl dayî ke herême newe ra dagir bikerî. Hêzê ma çarçeweya pawitişê meşrû de cewab dayî hêrişanê dagirkeran û netîce de şerêko giran qewimîya. Heme cepheyan de hêrişê dagirkerî ameyî şikitene.
* Cewabdayîşê hêzanê ma de bi desan çeteyî ameyî kiştene û birîndarkerdene.
* Sewbîna şer û pêrodayîşan de 5 embazê ma zî birîndar bîyî.”
