HSD bi eşkerayîyêke nuştekî da zanayene ke 24 saetanê peyênan de 61 çete û leşkerê tirkî ameyî kiştene û 4 wesayîtê leşkerî, 3 panzêr û motorêk ameyî derbkerdene. HSDyî dîyar kerd ke şer de 8 şervanê înan bi camêrî şehîd bîyî
Merkezê Resnayîşî yê Hêzê Sûrîyeya Demokratîke (HSD) netîceyê şer û pêkewtişanê 24 saetanê peyênan yê ke mabenê hêzê înan û hêzê dagirkeran de qewimîya bi eşkerayîyêke nuştekî eşkera kerd.
Eşkerayîya HSDyî de nê malumatî ameyî parekerdene:
“TIL TEMIR
* Artêşa tirkî ya dagirkere û çeteyê girêdayeyê aye bi çekanê giranan û hûmarêka zêde hêrişê dewa Mehmûdiyê kerdî. Hêzê ma zî çarçeweya pawitişê meşrû de cewab dayî û şerêko giran qewimîya. Sewbîna dewanê Kenher, Hecac, Derbo û Sîbatîyayê de zî hêzê ma cewab dayî hêrişanê dagirkeran û şerêko giran vejîya. Netîceyê şerî de 57 çete ameyî kiştene, 22 çete birîndar bîyî, 4 wesayîtê leşkerî, 3 panzer û motorêk ameyî derbkerdene. Artêşa dagirkere badê şikitişê hêrişê çeteyan bi teyareyanê şerî yê bêmerdim û obusan herême bombardûman kerde.
ZÎRGAN
* Artêşa tirkî ya dagirkere bi hêzêko gird waşte ke hêrişê dewanê Xedir Avî, Til Hirmil û herêma mabenê Xirbet Cimo û Ingel Hawa bikera. Cok ra konvoyêko gird erşawite herême. Hêzê ma peyser cewab da hêrişanê dagirkeran û konvoyê çeteyan yewbînan ra vila kerd. Çete mecbur mendî ke wesayîtanê xo vera bidî û biremî.
EYN ÎSA
* Artêşa tirkî ya dagirkere bi 3 tankan dewa Um Beramîlê bombardûman kerde. Hêzê ma sey cewab Şêrgirad û Marûdayê de vera grûba çeteyan de çalakî pê ardî. Netîceyê çalakîye de 4 çete ameyî kiştene û wesayîtêk ame derbkerdene. Artêşa dagirkere badê vindîkerdişanê xo herême bombardûman kerde.
* Pêropîya netîceyê cewabdayîşê hêzanê ma yê 24 saetanê peyênan de 61 çete ameyî kiştene, 22 çete ameyî birîndarkerdene û 4 wesayîtê leşkerî, 3 panzêr û motorêk înan ameyî derbkerdene.
* Pêroyê roje de 8 embazê ma şehîd bîyî û 11 embazê ma zî birîndar bîyî.”
