Nûnerên eşîra Şeyîtat a ereb êrîşên dewleta tirk ên li dijî rojavayê Kurdistanê şermezar kirin. Nûneran destnîşan kir ku parastina welat erka her kesî ye û heta ku xaka xwe ji dagirkeriya dewleta tirk rizgar dikin dê têbikoşin
Ji bo şermezarkirina êrîşên dewleta tirk û çeteyên wê yên li dijî rojavayê Kurdistanê, li bajaroka Ebû Hemam ê Dêrazorê çalakî hate destpêkirin. Di bin konê çalakiyê de tevî rûspiyên eşîra ereb a Şeyîtatê, gelek kesên din amade bûn.
Di çalakiyê de li ser navê Partiya Pêşerojê ya Sûriyeyê Enes Elî El Rehîm ê ji eşîra Şeyîtatê axivî û êrîşên dewleta tirk şermezar kirin. El Rehîm bal kişand ser tevlêbûna welatiyan a di konê çalakiyê de û wiha got: “Ev nîşaneya yekpareya welêt e. Parastina welat erkekî neteweyî ye ku dikeve ser milê her kesî. Em ji dewleta tirk a dagirker re ku axa me dagirkirî re dibêjin na.”
Şervan û şehîd silav kir
Bi berdewamî jî El Rehîm anî ziman ku ew wek gelên Bakur û Rojhilatê Sûriyeyê û êrîşên artêşa tirk red dikin û wiha bi dawî kir: “Heta ku em xaka xwe ji dagirkeran rizgar dikin em ê piştgiriyê bidin HSD’ê. Em rê nadin ku dewleta tirk careke din DAIŞ’ê li vê xakê vegerîne. Em hemû şervan û şehîdên HSD’ê yên ku ji bo parastina welatê xwe li dijî dagirkerên tirk têkoşiyan û têdikoşin silav dikin.” DÊRAZOR
