HSD’ê bi daxuyaniyekê encama şer û pevçûnên 24 saetên dawî aşkera kir. HSD’ê diyar kir ku di encama şer û pevçûnan de 20 çete û leşker hatin kuştin û 15 şervanên wan jî şehîd bûn
Navenda Ragihandina Hêzên Sûriyeya Demokratîk (HSD) têkildarî encamên şer û pevçûnên 24 saetên dawî yên bi dewleta tirk a dagirker û çeteyên wê yên DAIŞ, El Nusra û OSO’yê re daxuyaniyeke nivîskî bi raya giştî re parve kir.
HSD’ê destnîşan kir ku artêşa tirk a dagirker û çeteyên wê bi hemû hêza xwe ya teknîkî, ji bejahî û hewayî ve êrîşên xwe yên dagirkeriyê domandin û li dijî van êrîşan, hêzên wan jî di çarçoveya parastina rewa de bersiv dane.
Daxuyanî wiha dom kir:
“TIL TEMIR
* Artêşa tirk a dagirker û komên wê yên çete bi çekên giran, tang û balafirên bêmirov êrîşî gundên Tewîl, Dibsa, Menacîr û Um El Kêf kirin. Di encama bersivdayîna hêzên me de şerekî dijwar rû da û bi giştî 9 çeteyên artêşa dagirker a tirk hatin kuştin.
ZIRGAN
* Artêşa tirk a dagirker û çeteyên wê êrîşên xwe yên li ser gundên Bab El Ferec, Til Mihemed, Dawidiyê, Xişmê û Zirganê domandin.
EYN ÎSA
* Artêşa tirk a dagirker û çeteyên wê li derdora gundên Berberiyê, Şergirad û El Nasiriyê bi çekên giran, tang û balafiran êrîşên xwe domandin. Di encama bersivdana hêzên me de 11 çete û leşkerên dagirker hatin kuştin û 6 jî birîndar bûn. Her wiha hêzên me dest danîn ser çekeke AK-47. Êrîşên dagirkeran hatin şikandin.
* Bi giştî di encama bersivdayîna hêzên me û şerên ku qewimîn de 20 çete û leşker hatin kuştin û 6 jê birîndar bûn, hêzên me çekeke AK-47 desteser kir û tangek jî derb kir.
* Di vê berxwedanê de 15 hevalên me jî şehîd bûn û 13 jî birîndar bûn.”
