Walîtiyên Edene û Wanê bi armanca pêşîlêgirtina lidarxistina çalakiyên şermezarkirina tayînkirina qeyûman û êrîşên li dijî rojavayê Kurdistanê, qedexeya lidarxistina çalakiyan ji bo 15 rojan dirêj kir
Hikûmeta faşîst a AKP-MHP’ê ji bo pêşîlêgirtina bertekên li dijî pêkanînên wan ên faşîzmê, bi zextê hewl didin ku dengê gel bifetisînin. Hikûmeta ku ji her alî ve êrîşî kurdan dike, hewl dide ku li her çar parçeyên Kurdistanê jî hemû deskteftiyên kurdan tune bike. Li hêlekê şaredariyên ku bi îradeya gel hatine bidestxistin xesp dike û li hêla din jî li rojava û başûrê Kurdistanê êrîşên qirkirinê pêk tîne.
Di vê çarçoveyê de walîtiya Edeneyê bi armanca pêşîlêgirtina çalakiyên ku dê ji bo şermezarkirina êrîşên dewleta tirk ên li dijî Rojava û tayînkirina qeyûman bên lidarxistin, bi daxuyaniyekê ragihand ku heta 15 rojên din hemû çalakî û şahî qedexe kirine.
Hezar û 84 roj in qedexe didome
Bi heman boneyê walîtiya Wanê jî daxuyaniyek da û destnîşan kir ku her cure çalakî û şahî heta 15 rojan hatine qedexekirin. Hêjayî bibîrxistinê ye ku li Wanê ji 21’ê mijdara sala 2016’an heta niha sepana qedexekirina çalakî û şahiyan didome. Li Wanê ev hezar û 84 roj in çalakî qedexeyan heye.
