Endama PMyî ya HDPyî Ozlem Gunduze dîyar kerde ke ê bi serkêşîya TJAye çarçeweya 25ê Teşrîna Peyêne de Amed de panel û rayîrşîyayîşêk virazenî û wina va: “Cinîyê ke hetê DAIŞî ra ameyî hedefgirewtene vera çeteyan de şoriş pê ardî. Ma înan xo rê esas herînenî û ma do rêxistinbîyayîş û têkoşînê xo berz bikerî.”
Seba 25ê Teşrîna Peyêne Roja Têkoşînê Vera Şîdetê Serê Cînîyan yê Mîyanneteweyî Tirkîya û pêroyê dinya de amadekarî yenî kerdene. Cinîyî pêroyê dinya de aşma Teşrîna Peyêne de programan organîze kenî û çalakîyanê cîya-cîyayan pê anî. Cinîyî heme organîzasyonan de raşteyan pir kenî û azadîya cinîyan qêrenî. Çarçeweya programan de heta qezayan de zî xebat yenî kerdene û heqê cinîyan ser o yeno qiseykerdene. Endama PMyî ya Partîya Demokratîke ya Şaran (HDP) Ozlem Gunduze dîyar kerde ke ê do na çarçewe de progaramê xo eşkera bikerî.
‘Pêkerdişê Stenbolî tedbîr o’
Ozlem Gunduze qiseykerdişê xo de daye zanayene ke Pêkerdişê Stenbolî vernîgirewtişê her tewir şîdet û nêseyyewbînanî yo û wina va: “Ma na babete eşkenê serê çend sernameyan de vajî. Ganî proseso ke hemde tede şîdet zêdeyo de tedbîrî bêrî girewtene. Sewbîna no pawitişê cinî yo û caardişêko qanûnan o. Tewr peynî zî xurtkerdişê cinîyan o. Pêkerdişê Stenbolî tedbîr o.”
Gunduze ard ziwan ke hukmat bi kampanyaya îmzeyan hewl dano ke pêkerdişê Stenbolî fes bikero û ganî no nizdîbîyayîş sey çîyêko normal nêro vînayene û no problemêko zihnîyetî yo.
‘Qezencî yenî hedefgirewtene’
Gunduze dewamê qiseykerdişê xo de dîyar kerde ke demê peyêna de şîdet vejîyayo merheleyêka tewr berzî û eynî wext de her roje cinîyî yenî qetilekrdene û va: “Çîyê ke yenî cuyayene netîceyê zihnîyetê îqtîdarî de pê yenî. No zihnîyet bîyayîşê xo her tewiranê şîdet, şer û qirkerdişî ra domneno. Nizdîbîyayîşê vera Pêkerdişê Stenbolî zî netîceyê eynî zihnîyetî yo.”
‘Programê ma do aşma Teşrîna Peyêne dekero’
Unduze qiseykerdişê xo yê peyênan de bale ante 25ê Teşîrîna Peyêne ser û va: “Do heta peynîya aşma Teşrîna Peyêne organîzasyonê ma bibî. Labelê no do tena aşma Teşîrîna Peyêne nêbî. Cinîyê ke hetê DAIŞî ra ameyî hedefgirewtene vera çeteyan de şoriş pê ardî. Ma înan xo rê esas herînenî û ma do rêxistinbîyayîş û têkoşînê xo berz bikerî.” AMED
