Hemwelatijê Seyîdsadiqî dîyar kerdî ke bîyayîşê leşkeranê tirkî yê herra Başûrî çîyêko asayî nîyo û şarê başûrî leşkeranê tirkî qebûl nêkeno. Hewelatijî dayî zanayene ke leşkerê tirkî zî do sey rejîmê Baasî herra Başûrî ra bêrî vetene
Hêrişê dewleta tirkî ya dagirkere û çeteyê pabesteyê aye yê vera vakur û rojawanê Kurdistanî bêmaben dewam kenî. Dewleta tirkî hetêk ra wazena tewrê çeteyanê xo temamîya rojawanê Kurdistanî dagir bikera û heto bîn ra zî gam bi gam Başûrê Kurdistanî dagir kena. Hehmwelatijê Başûrî reaksîyon nîşanê hêrişanê dagirkerîye dayî. Derheqê babete de hemwelatijê qezaya Seyîdsadiqî ya Silêmanî Rojnewsî rê qisey kerdî.
Hemwelatijê bi nameyê Mehmûd Şêx Nûrî da zanayene ke başûrê Kurdistanî de kamî şexsîyet ya zî hîzb beno wa bibo yê ke dewleta tirkî reyde pê kerdî, seba menfaatanê xo yewbînan reyde pêkerdî û eleqeya na rewşe şarî reyde çin a. Nûrî bale ant bîyayîşê leşkeranê tirkî yê Başûrî ser û wina va: “Çi hawayî beno wa bibo ma leşkeranê Baasî Başûrî ra pak kerd. Ganî ma leşkeranê tirkî zî herra Başûrî ra pak bikerî. Qerarê parlementoyî seba menfaatanê şarî çîyêk nênêkenî.”
Ganî keso ke destûr dayo dewleta tirkî bêro cezakerdene
Hemwelatijê bi nameyê Hîwa Raufî zî qiseykerdişê xo de dîyar kerd ke bîyayîşê leşkeranê tirkî yê herra Başûrî ser çîyêko asayî nîyo û wina dewam kerd: “Ê bi pêkerdişan ameyî. Ganî bêro zelalkerdene ke senî rayîr leşkeranê tirkî rê ameyo akerdene ke 30 kîlometre kewtî mîyanê herra Başûrî. Ganî hukmat, selahîyetdar, parlemento û rayîrberê herêmî no şaşî raşt bikerî. Şarê Kurdistanî leşkeranê tirkî qebûl nêkeno. Ganî parlemento ra qerarê vetişê leşkeranê tirkî biameyêne vetene.” SILÊMANIYE
