Hêzên dagirker ên dewleta tirk û çeteyên wê êrîşî gundên Til Temirê kirin. Di encama êrîşan de 2 leşkerên rejîmê birîndar bûn. Her wiha hêzên dagirker li gundê Ingel Hawayê jî hêzeke mezin bi cih dike
Leşkerên artêşa tirk a dagirker û çeteyên wê yên DAIŞ, El Nusra û OSO’yê ji 9’ê cotmehê ve êrîşên xwe yên li dijî rojavayê Kurdistanê didomînin. Hêzên dagirker ên ku lihevkirinên ji bo agirbestê binpê dikin, bi koordîneya balafirên keşfê û bi alîkariya balafirên şer êrîşî gundên Til Temir, Zirgan û Eyn Îsayê dikin.
Hat zanîn ku artêşa tirk a dagirker û çeteyên El Nusra û DAIŞ’ê bi obus û hawanan êrîşî gundê El Qasimiyê, Rîhaniyê, Mehmûdiyê û Dawidiyê yên Til Temirê dikin. Her wiha çavkaniyên ji herêmê ragihand ku balafirên keşfê yên hêzên dagirker jî li ser van gundan digerin.
2 leşkerên rejîmê birîndar bûn
Her wiha artêşa tirk û çeteyên wê bi çekên giran, obus û tangan êrîşî gundê Til Werid û Ereb Xan ên Til Temirê dikin. Di van gundan de hêzên rejîma Sûriyeyê hene. Hêzên rejîmê bi çekên giran bersiva êrîşan didin. Çavkaniyan got ku li gundên Zirgan a Serêkaniyê mayîneke ku hêzên dagirker çandibûn, bi leşkerên rejîmê ve teqiya. Di teqînê de 2 leşker birîndar bûn. Leşkerên birîndar rakirin Naxweşxaneya Şehîd Xebat a Dirbêsiyê.
Amadekariya êrîşê
Li gorî agahiyên ji herêmê, artêşa tirk a dagirker û çeteyên wê yên DAIŞ û El Nusrayê hejmareke zêde ya çekên giran, obus, tank û çeteyan li aliyê gundê Ingel Hawa yê Til Temirê bi cih dike. HESEKÊ
