Hemserekê Pêroyî yê HDPyî Sezaî Temellîyî kongreya Rêxistina HDPyî ya Riha de bale ant polîtîkayanê şerî yê îqtîdarî ser û va: “Netîceyê polîtîkayanê şerî yê îqtîdarî de gule bi para kurdan sîyanur zî bi para tirkan.”
Rêxistina Partîya Demokratîke ya Şaran (HDP) ya Riha bi tewrbîyayîşê Hemserekê Pêroyî yê HDPyî Sezaî Temellî 3. Kongreya Nizamî serûber kerde. Partîya Saadetî, Meclîsê Mayanê Haştîye, endamê meclîsê HDPyî û zaf kesî tewrê kongre bîyî. Polîsan cigêrayîşê GBTyî ra dima beşdarî girewtî zereyê salone.
Temellîyî kongre de vat: “Ma bi hêvî xo rêxistin bikê û faşîzm çin bikê.” Temellîyî bale ant polîtîkayanê şerî yê îqtîdarî ser û wina vat: “Netîceyê polîtîkayanê şerî de fîşek bi para kurdan û sîyanur zî bi para tirkan. Îqtîdar şaran keno dişmenê yewbînan. Na dişmenîye do qet pîl nêba. No îqtîdar seba kurdan heqanê merdiman nas nêkeno. 5 serrî yê ke Îmrali de tecrîdêko giran esto. Ganî tecrîd bêro şiknayene. Ganî gamê huqûqî û edaletî bêrê eştene. Tecrîdê Tirkîya ser o awil bi rijnayîşê tecrîdê Îmrali dest pêkeno. Seba naye zî ganî awil mesela kurdan çareser biba. Reya verêne kewtî Efrînî. DAIŞ girewt xo pey û hêrişan kenê. A herêma cenetî kerde cehenem. Nêzdîyê 44 hezar merdimî neçare mendî ke koç bikê. Çira hêriş kenê? Çunke dişmenê kurdan ê. Demokratîkbîyayîşê Sûrîye demokratîkbîyayîşê Tirkîya yo. Bêrê ma pîya vera faşîzmî têkoşîn bikê. Êyê ke seba tezkere vat heya bêguman zerar da demokrasîyî. Ma ewro vînenê ke rîyê şerî ra fîşek bi para kurdan sîyanur zî bi para tirkan. Ma hînî şer nêwazenê.”
Qiseykerdişê Temellîyî ra dima weçînayîş ame kerdene. Weçînayîş de Mîkaîl Gozek û Emîne Çetîner sey hemserekanê HDPyî yê Riha ameyî weçînayene. RIHA
