Serokê DYA’yê Donald Trump îdia kir ku neçarbûna Serokdewletê Bolîvyayê ji bo îstîfakirinê nîşaneyeke ji bo ‘rejîmên nerewa’ ye
Serokdewletê Bolîvyayê Evo Morales piştî xwepêşandanên mûxalefeta rastgir bi zexta artêşê neçar ma ku îstîfa bike. Ev yek ji aliyê gelek dewletan ve weke ‘darbeyê’ hate pênasekirin.
Dewletên Yekbûyî yên Amerîkayê (DYA) ku bi piştgiriya xwe ya ji bo dijberên Morales û plankirina darbeyê li gelek welatan tê sûcdarkirin, îdia kir ku îstîfaya Morales ‘hişyariyeke’ ji welatên din re.
Serokê DYA’yê Donald Trump daxuyaniyeke çapemeniyê weşand û xwest ku rejîmên ‘bi rengekî nerewa’ hatine ragihandin bala xwe bidin ser vê encamê û Trump Venezûela û Nîkaragûa kir hedef ku partiyên sosyalîst lê desthilatdar in.
Trump helwesta artêşa Bolîvyayê ku piştgiriya xwe ji Morales vekişand silav kir û wiha got: “DYA gelê Bolîvyayê ji ber ku daxwaza azadiyê dike û artêşê jî ji ber ku hurmetê nîşanî sonda xwe ya ji bo parastina Destûra Bingehîn silav dike.”
Her wiha Trump gefan xwar û wiha got: “Bûyerên qewimîn (li Bolîvyayê) ji bo rejîmên nerewa yên li Venezûela û Nîkaragûayê ‘nîşaneyeke aşkera’ ye ku ‘demokrasî û îradeya gel’ wê tim bi ser bikeve.” WASHINGTON
