Verê Şaredarîya Perî ke qeyûm tayînê aye ame kerdene de çalakîya roniştişî dest pêkerde. Şaredarê Dêrsimî Mehmet Fatih Maçoglu dîyar kerd ke tayînkerdişê qeyûman neheqî û desteserkerdişê îradeya şarî yo
Ewro reyna Wezîrîya Karê Zerre qeyûm tayînê şaredarîyan kerde. Bi fermanê Wezîrîya Karê Zerre qeyûm tayînê şaredarîyanê Partîya Demokratîke ya Şaran (HDP) yê qezaya Yenîşehîr û Hezro yê Amedî, qezaya Hezexî ya Şirnexî û Bajarokê Perî yê pabesteyê qezaya Mazgêrdî ya Dêrsimî ameyî kerdene.
Hemşaredarê Bajarokê Perî yê qezaya Mazgêrdî Songul Erden û Orhan Çelebî bi fermanê Wezîrîya Karê Zerre wezîfe ra ameyî girewtene û qeyûm tayînê herinda înan ame kerdene. Qerarê tayînkerdişê qeyûman reyde bi seyan leşkerî girêyayî awanîya şaredarîye û awanî girewtî binê ablûqa.
Parlamentera HDPyî Dilşat Canbaz, Hemşaredar Songul Dogan û Orhan Çelebî, Hemserekê HDPyî yê Dêrsimî Hidir Çîçek û Endamê Meclîsê Partîye yê HDPyî Ferhat Yildizî verê şaredarîye de ameyî têhet û leşkerî nêverdayî ke ê bikewî şaredarî. Hedîse ra dima mabenê leşker û HDPyijan de munaqeşe vejîya û ame vatene ke derheqê tayînkerdişê qeyûman de tu xeberêk nêdîyayo înan.
Şaredarê Dêrsimî Mehmet Fatîh Maçoglû şî zîyaretê Hemşaredar Songul Dogan û Orhan Çelebî û reaksîyon nîşanê tayînkerdişê qeyûman da. Maçoglû qiseykerdişê xo de da zanayene ke serra 2016î ranata no dewam keno û va: “Tu qerarêk mehkema hemşaredaran rê nêameyo erşawitene. No neheqî û desteserkerdiş o. Sey Wan, Mêrdîn û Amedî ma do wayîrê îradeya şarî bivejî.”
Hemşaredar Çelebî zî Maçoglûyî rê spas kerd û tayînkerdişê qeyûman şermizar kerd. Çelebî qiseykerdişê xo de wina va: “Ma xizmetê xo yê seba şarî dewam bikerî. Ma do şarî reyde taxan de bî. ma wazenê ke şar wayîrê şaredarîyanê xo û îradeya xo bivejîyo.”
Badê eşkerayîye hemşaredar û hemwelatijî verê awanîya şaredarîye de dest bi çalakîya roniştişî kerdî. DÊRSIM
