Parlamenterê HDPyî yê Dêrsimî Alîcan Onluyî va: “Êyê ke seba Terteleyê Dêrsimî bêveng mendî ewro zî seba neheqîye, bêhuqûqîye, dagirkerdiş û hêrişanê Rojawanî bêveng manenê.”
Parlamenterê Partîya Demokratîke ya Şaran (HDP) yê Dêrsimî Alîcan Onluyî derheqê serrgêra 82. ya dardekerdişê Seyîd Rizayî û embazanê ci de Meclîsî de kombîyayîşê çapemenîye viraşt.
Onluyî bi şermezarkerdişê Tertela Dêrsimî dest pêkerd û wina dewam kerd: “Seyîd Riza û embazê ey 82 serrî verê cû bi hîleyan û dekan ameyî qetilkerdene. Ez Seyîd Riza, Usenê Seydî, Findiq Axa, Seyd Usen, Hesenê Îbrahîmî, Hesen Axa û Elîye Mîrzalî yê ke 15ê teşrîna peyêna 1937î de ameyî qetilkerdene û nika bêgor û bêkefen ê bi rêzdarî û bi heskerdişî ana xo vîrî. Ez Elîşêr û Zerîfa yê ke Qoçgirî de ameyî qetilkerdene zî ana xo vîrî.
Nameyê ey Tuncelî nîyo Dêrsim o
Onluyî îfade kerd je meneya çekuya terteleyî talankerdiş û qirkerdiş o û şarê Dêrsimî nameyê ci sey ‘Roja Reşe’ naye pa. Onluyî va: “Nameyê ey Tuncelî nîyo Dêrsim o.”
Domanê 3 serre ra bigêrê heta kalpîrê 90 serre 56 kesî keyeyê mi ra ameyî qetilkerdene. Wexto ke babete sey kurdan û elewîyan ma biba ma vînenê ke çi anê ma ser. O çax vatêne eşkîya nika zî vanê terorîst. O çax kênayê ma dayêne keyeyanê leşkeran. Nika zî domananê kurdan, elewîyan û êzidîyan bazaran de sey koleyan roşenê. Senî ke serranê 1935î de mufetîşanê umûmîyan, walî û fermandaran surgun kerdêne, hukm kerdêne ewro zî walî û qaymeqaman sey qeyûm erşawenê û pêro birran ê danê.”
Onluyî qiseykerdişê xo wina qedîna: “Êyê ke seba Terteleyê Dêrsimî bêveng mendî ewro zî seba bêhuqûqî, neheqîye, hêrişê Rojawanî bêveng manenê. Ma sey tornanê Seyît Rizayî embazanê ey vera polîtîkayanê çinkerdişî bêveng nêmanenê û milê xo çewt nêkenê.” ANQARA
