Verê Şaredarîya Pêrî ya Dêrsimî de çalakîyêke ameye viraştene û ame vatene: “Pê çîtan û dêsan berzkerdişî, postalanê leşkeran şima nêeşkenê na mesele çare bikê. Sîyasetê qeyûman mezg û zerrîya kurdan û cinîyan de qet do ca nêgêro.”
Verê Şaredarîya Pêrî ya Mazgêrtî ya Dêrsimî de bi beyanatêkî qeyûm ame protestokerdene. Hemserekê Şaredarîya Pêrî, temsîlkarê partî û dezgehan, endamê meclîsê şaredarîye, Parlementerê HDPyî yê Stenbolî Dilşat Canbaz Kaya û zaf hemwelatijî tewrê beyanatî û çalakîya roniştişî bîyî.
Serekê Partîya Kede ya Dêrsimî Ergîn Tekînî çalakîye de qisey kerd û vat: “Sîyasetê qeyûman şarî rê îxanet o. Sîyasetê qeyûman metodêkê îqtîdarî yo. Di rîyê nê sîyasetî estê, ê yewîn îhlalê heqê weçînayîşê şarî yo, ê diyîn zî bêçaretîya mesela kurdan o.
Nameyê Federasyonê Meclîsanê Sosyalîstan ser o Hidir Yildizî qisey kerd û vat: “AKP xespanê heqanê şarî dewam keno. Ma zî têna eşkenê ke bi yewîya têkoşînê şorişgêrî nê hêrişan vindarnê.
Hemhetkara Hemserekan ê Pêroyînan a Partîya Şaran ê Bindestan Beycane Taşkiran va: “Tîya hînî şaredarîye nîyo, qereqol o. Pê çîtan û dêsan berzkerdişî, postalanê leşkeran şima nêeşkenê na mesele çare bikê. Sîyasetê qeyûman mezg û zerrîya kurdan, cinîyan de qet do ca nêgêro. Ma do nêverdê ke heqê şarê ma bêrê xespkerdene. Ewro ê tîya de yê la siba do şorê. Şarê ma do wayîrê îradeyê xo bivejîyo.” DÊRSIM
