Rojnameger Rûken Demîr û Melîke Aydin û 9 endamên TUHAY-DER’ê yên ku çend roj berê li Îzmîrê hatibûn binçavkirin, hatin girtin
Nûçegihana Ajansa Mezopotamyayê (MA) Rûken Demîr û nûçegihana JINNEWS’ê Melîke Aydin di 12’ê mijdarê de di çarçoveya lêpirsîna ku Serdozgeriya Komarê ya Îzmîrê dabû destpêkirin, hatibûn binçavkirin.
Rojnameger Demîr û Aydin duh derxistin Dadgeha Îzmîrê. Piştî îfade bi dawî bûn jî dadgehê bi îdiaya ‘Li ser navê rêxistinê xebat meşandine’ rojnameger Demîr û Aydin girtin û şandin Girtîgeha Jinan a Şakranê.
Endamên TUHAY-DER’ê jî hatin girtin
Ji endamên Komeleya Piştevaniya Malbatên Girtî û Hikûmxwaran (TUHAY-DER) Selma Altan, Mazlum Koç, Ramazan Yavuz, Saît Bahadir, Murat Tufan, Îsmaîl Akbay, Şeyhmus Daghan, Hasan Hayrî Dîkîlîtaş û Hediye Tekîn ên di heman operasyonê de hatibûn binçavkirin jî hatin girtin.
Biryarê nas nakin
Endamê TUHAY-DER’ê Mehmet Gergîn bi şertê qedexeya derketina derveyî welat hat berdan. Têkildarî mijarê hevserokê TUHAY-DER’ê Ahmet Ertaş li ber dadgehê daxuyaniyeke kurt da û got ku darizandin di bin zexta AKP’ê de hatiye kirin û biryara girtinê ne hiqûqî ye û ew vê biryarê nas nakin. ÎZMÎR
