Kanala televîzyonê ya NRT 2’yê weşandina rêzefîlm, klîb û hemû berhemên hunerî yên tirkî boykot kir. Her wiha 2 rêzefîlmên tirkî ku berê kiribûn jî betal kirin
Gelê başûrê Kurdistanê piştî ku dewleta tirk êrîşên qirkirinê li dijî rojavayê Kurdistanê da destpêkirin, kampanyayên boykotkirina malên tirkî dan destpêkirin. Bi destpêkirina kampanyayê re gelek kanalên televîzyonê jî weşandina rêzefilmên tirkî û reklamên tirkî boykot kirin.
Yek ji van kanalan jî NRT 2 ye. NRT 2’yê biryar da ku êdî tu rêzefîlmên tirkî û klîbên tirkî neweşîne. Rêveberên kanalê têkildarî mijarê diyar kirin ku weşandina rêzefîlmên tirkî rastî nerazîbûnên gel tên. Ji rêveberên kanalê Rizgar Mihemed anî ziman ku ji ber êrîşên ser Rojava, wan rêzefîlm, klîb û hemû berhemên hûnerî yên tirkî boykot kir.
Mihemed anî ziman ku wan di demên berê de 2 rêzefîlmên tirkî kirîbûn û wina domand: “Niha em ê bi rêya parêzerên televîzyonê hewl didin wan her du rêzefîlman vegerînin. Weşandina rêzefîlmên tirkî, rastî bertekên gel hat.”
‘Temaşevan êdî rêzefîlmên tirkan naxwazin’
Xwediyê kompanyaya Homal Medyayê Saman Hacî Fayeq ku karê dublajê dike jî der barê mijarê de wiha got: “Piştî êrîşên ser rojavayê Kurdistanê hate kirin, rêzefîlmên tirkî bi awayeke berbiçav ji aliyê temaşevanan ve hate redkirin. Dahata ku em ji bo rêzefîlmên tirkî xerc dikîn, em ê ji bo rêzefîlmên welatên din bi kar bînin. Temaşevan jî êdî naxwazin rêzefîlmên civakê têk dibin temaşe bikin. Rêzefîlmên tirkî jî gelek tişt tê de hene û divê ji civaka kurdan werin dûrxistin.” SILÊMANIYE
