Dêrsim de berardişê emserrî yê mehsulê silqe citkaran memnun nêkerd. Citkaran ra Haşim Kaya da zanayene ke bedilîyayîşê îklîmî vera mehsul kêmî bîyo
Beldeya Perî ya girêdayeyê qezaya Mazgêrdî ya Dêrsimî de çinitişê silqe dest pêkerd û ver bi qedîyayîşî de yo. Beldeya Perî de esmer 2 donim erd ser de silqe ameye ramitene. Çinitişê silqe aşma kanûne de qedîyeno. Citkarî erdê ke çolterê koyan de tede silqe ameyî ramitene bi xo çinenî û mîyanê erazî de zî makîne çinenî. Silqê ke yenî berardene erşawîyenî Fabrîkaya Şekerî ya Xarpêtî.
Citkarî her serre nêeşkenî eynî erd de silqe biramî. Ganî 4 serran de reyêk eynî erd de silqe bêra ramitene. Çimkî eke her serre silqe bêra ramitene dayîşê mehsulî kêmî beno.
Citkar Haşîm Kaya belde de 100 donim erde ser de silqe ramito û 10 serrî yo ke citkarîya silqe keno. Kaya qiseykerdişê xo de bale ant zehmetîyanê citkarîye ser û va: “Karêko zehmetin o. Berardişê emserrî goreyê serranê verênan kêm î. Çimkî wisar zêde varan vara û ma erê ramit. Yanî ma eşkenê vajê ke kar û zirarê emserrî yewbînan vet.” DÊRSIM
