Cinîyê ke bajarekê Pêrî yê Dêrsimî de ciwîyenê vat seba ke şaredarîya înan hetê îqtîdarî ra ameye xespkerdene ê do 25ê Teşrîna Peyêne de vera şîdetê serê cinîyan û qeyûmê vera îradeyê şaran vejîyê kuçeyan
Bajarekê Pêrî yê Mazgêrdê Dêrsimî de cinîyî emser 25ê Teşrîna Peyêne Roja Têkoşînê Vera Şîdetê Serê Cinîyan de pîya şîdetê serê cinîyan do qeyûmê vera îradeyê şaran zî şermezar bikerê.
Cinîyan ra Sakîne Yildiz bale ante zehmetîyê ke cinîyî ancenê û xoverdayîşê cinîyan ser û va: “AKP keno ke bi hêrişan ma biterso û peyser game bido eştene la ê se kenê wa bikerê ma do xoverdayîşî ra xo meancê. Ma sey cinîyî û şarê Kurdî do heta serkewtiş têkoşîn bikerê.”
Turkane Aslan zî vat: “Tehemulê înan destkewteyanê cinîyan û kurdan rê çîn o. Çoka wina heriş kenê. La pê hêrişan nêeşkenê vernîya ma bîgêrê. Hêrişî çend gird bê xoverdayîşê ma zî wina gird beno.”
Gultene Gunduz bale ante hêzê cinîyan ser û va: “Ma cinîyî jêhat ê û eşkenê şîdetî bidê vindarnayene. Ganî ma xopawitiş û vervejîyayîşî bimusê. Bi qeyûman sîstemê hemserekîye hedef yena girewtene. Ma sey cinîyan ê Pêrî emser do vera qeyûmî kuçeyan de vengê xo berz bikerê û wayîrê hemserekîye bivejîyê.”
Endama Meclîsê Şaredarîya Pêrî Narîne Guray zî va: “Qeyûmî wazenê sîtemê hemserekîye çîn bikerê. Sîstemê hemserekîye xeta ma ya mor a. Ma do her ca yê cuya de na sîstemê bipawê û bi xoverdayîşî ser bikewê.” DÊRSIM
