Li Girtîgeha Jimare 2 a Tîpa T a Osmaniyeyê, 30 girtî ji ber binpêkirinên mafan û muameleyên nebaş ji 12’Yê Mijdarê ve di greva birçîbûnê de ne. Girtiyan diyar kirin ku sedem midûrê girtîgehê ye û gotin ku heta daxwazên wan pêk neyên dê çalakiya wan bidome
Li Girtîgeha Jimare 2 a Tîpa T a Osmaniyeyê, 30 girtî ji ber binpêkirinên mafan û muameleyên nebaş ji 12’yê Mijdarê ve di greva birçîbûnê de ne. Ji girtiyên di greva birçîbûnê de Mehmet Selîm Suer, Mehmet Goz, Sabahattîn Karasû, Nevaz Sakçak, Suleyman Saçal, Candan Yen, Zenar Demîr, Abdûllah Ûçar, Kasim Balta, Sedat Karak, Adem Amaç, Mehmet Kazici, Mehmet Kilinç, Mîkaîl Pelît, Abdûllah Topaloglû, Mehmet Emîn Dal, Recep Yel, Akar Îkbal, Veysî Baltaş, Mehmet Îpek, Hasan Muhammet Îbîş, Yildirim Kiş, Baver Başaran û Halîl Îbrahîm Karataş, ragihandin ku heta daxwazên wan pêk neyên dê çalakiya wan bidomînin.
Komîsyona Girtîgehan a Komeleya Mafên Mirovan (ÎHD) a Edeneyê, Komeleya Piştevanî û Alîkariyê ya ji bo Malbatên Girtî û Hikumxwaran (TÛAYDER) û Komeleya Hiqûqnasên ji bo Azadiyê (OHD) bi girtiyan re hevdîtin çê kirin û raporek amade kirn. Parêzerên van saziyan hevdîtin bi girtî Mehmet Îpek, Mehmet Kazici, Adem Amaç, Hasan Mûhammet Îbîş û Sedat Kara re çê kirin. Parêzeran destnîşan kir ku girtiyan gotiye heger daxwazên wan neyên qebûlkirin dê dest bi rojiya mirinê bikin.
‘Bijîşk bi awayekî nîjadperestî û faşizan nêz dibe’
Girtî Sedat Karak diyar kir ku 50 kes di girtîgehê de ne, 20 girtiyên nexweş ne têde, 30 kes di greva birçîbûnê de ne. Karak ragihand ku li girtîgehê pirsgirêka mezin ferzkirina jimariya leşkerî ye û ji ber vê ferzkirinê qebûl nakin gef li wan tên xwarin, heqaret li wan tên kirin, tên derbkirin û cezayê dîsîplînê li wan tê birîn.
Karak anî ziman ku bijîşkê revîrê Fatîh Toz ji wan re gotiye ‘Em dizanin we li derve çi gû bela kiriye. Çi bi we tê bila bê. S….. bin herin û ragihand ku muayeneya kelmçekirî li girtiyan tê ferzkirin û mafê wan ê tedawîkirinê tê astengkirin û wiha domand: “Ji ber arbedeya 3 meh berê ku ji bo jimariya şipyakî qewimî bû, êdî her sibeh û êvar zêdetirî 10 gardiyan bi kamerayan tên qawîşan. Ji ber em jimariyê şipyakî qebûl nakin, bi kamerayan dîmenan digirin û diçin. Paşê di girtekên amade dikin de derbarê me de lêpirsînên dîsîplînê dest pê dikin. 3-4 meh in derbarê her yekî ji me de nêzî 15 lêpirsînên dîsîplînê hatine destpêkirin. Tenê yê min, niha 3 heb cezayên min ên hevdîtinê hene. Dadgeriya Înfazê û Dadgeha Cezayê Giran van cezayan pesend dikin. Bi vî awayî tê xwestin înfaza me bê şewitandin. Bi van cezayên dîsîplînê çavê wan lê ye me bitepisînin. Me hevdîtin bi midûrê girtîgehê Hîdayet Mulayîm re çê kir. Mulayîm ji me re got ‘Heger hûn jimariya şipyakî qebûl bikin, hûn ê karibin sûdê ji aktîvîteyan hemûyan bigirin, hûn ê karibin mafên xwe bi kar bînin, ez ê lêpirsînên we yê dîsîplînî betal bikim.’ 2 sal in tenê em karin sporê bikin. Em nikarin hevalên xwe yên li qawîşên din bibînin. Her wiha ne rojnameya Evrenselê ne jî ya Yenî Yaşamê, nadin me. Ji bo şermezarkirina van pêkanînan me dest bi greva birçîbûnê kir. Ji 14’ê mijdarê ve em di greva birçîbûnê de ne. Niha em 30 kes di greva birçîbûnê de ne. Tenê girtiyên nexweş û hevalên hindik maye înfaza wan biqede ne têde ne.”
‘Berpirsyar midûr e’
Girtî Mehmet Îpek destnîşan kir ku berpirsiyarê van pêkanînan hemûyan midûrê girtîgehê Hîdayet Mulayîm e û got ku jimariya şipyakî cara ewilî di 8’ê tebaxê de dest pê kiriye û ji ber ev ferzkirin qebûl nekirine hatine derbkirin.
Îpek diyar kir ku bijîşk rapora derbkirinê nedaye wan û bi muameleyeke xirab re rû bi rû mane û ev tişt anî ziman: “Nameyên me nadin me. Dest danîne ser radyoyên me. Her roj lêpirsîn, qedexekirina hevdîtina vekirî, cezayê hucreyê tê birîn. Provakasyon tên kirin. Guh nadin giliyên me. Berpirsiyarê van pêkanînan hemûyan midûrê girtîgehê Hîdayet Mulayîm û sergardiyan Olker e. Ev kes talîmatê didin. Heger daxwazên me yên greva birçîbûnê neyên qebûlkirin, em ê dest bi rojiya mirinê bikin. Divê heyetek bê girtîgehê. Ji bo daxwazên me yên ji bo rojname, sohbet hwd. jimariya li ser pêyan tê ferzkirin. Daxwaza me ya sereke betalkirina vê jimariyê ye.”
Cezayên hevdîtina vekirî û hucreyê
Girtî Adem Amaç jî anî ziman ku li qawîşa tê de ye 4 kes ji 14’ê mijdarê ve di greva birçîbûnê de ne. Amaç destnîşan kir ku ji ber cezayê dîsîplînê li girtiyên siyasî hemûyan nêzî sal û nîvekê cezayê hevdîtina vekirî, cezayê hucreyê hatine birin û wiha got: “Piştî greva birçîbûnê tenê roja ewil em kontrolkirin. Paşê bi tu awayî ji bo tenduristiyê kontrol nehatin kirin. Heta niha 12 caran emeliyat bûme û ji ber greva birçîbûnê tenduristiay min nebaş e. Lê belê girtîgehê wekî din tu çare nehişt. Em dixwazin ev bêhiqûqî ji holê bê rakirin.”
Bijîşk heqaretê li girtiyan dike
Girtî Mehmet Kazici jî destnîşan kir ku berpirsiyarî tev di stuyê midûrê girtîgehê Hîdayet Mulayîm de ye û diyar kir ku ji zûvde ye aktîvîteyên wan ên civakiyî tên binpêkirin.
Her wiha Kazici anî ziman ku wan nabin revîrê û gava dibin jî bijîşkê girtîgehê Fatîh Toz dibêje ‘Ji xwe diyar e tu çî yî’ û heqaretan li wan dike û guh nade pirsgirêkên wan. MÊRSÎN
