Verê çend rojan Îzmîr de bêrê yew keyeyê elewîyan ser o ‘Bitewezîye Elewî’ ameybî nuştene û nîşanê reykî ameybî xêzkerdene. Kalê elewîyan şîyî zîyaretê keyeyî û dîyar kerdî ke ganî dewlete no problemî çareser bikera
Verê çend rojan Taxa Yeşîlî ya Qezaya Gazîemîrî ya Îzmîrî de dêsê keyeyêk elewî ser de ‘Bitewezîye Elewî’ ameybî nuştene û nîşanê reykî ameybî xêzkerdene. Badê hedîse reaksîyonî zêdîyayî û seba paştîdayîşê keyeyê Şenalî zîyaretî yenî kerdene. Kalê elewîyan şîyî zîyaretê keyeyî û dîyar kerdî ke ganî dewlete no problemî çareser bikera.
Serekê Federasyonê Weqfê Elewîyan Remzi Akbulut, Hetkara Serekê Pêroyî yê Komeleya Kulturê Pîr Sultan Abdalî (PSAKD) Yildiz Yilmaz, Serekê Cemxaneyê Narlidere Mustafa Aslan, Serekê Cemxaneyê Buca Huseyîn Gokçe, kalikê Ocaxê Mansur Bababyî Hamza Takmaz, kalikê Ocaxê Sinemilli Suleyman Deprem, aktîvîsta elewî Elif Bakir û kalikê Ocaxê Kureyşanî ra Hamza Takmazî şîyî zîyaretê keyeyê Şenalî ke ameybî xêzkerdene.
Gullu Kubîlaya ke keyeyê aye ame xêzkerdene kesê ke keye xêzkerdî lanet kerde û va: “Bi hêrişan nêeşkayî ma biqedînî. Ma timî payan ser de yî. Ma rewşe vera tetikan ser de yî. Zîyaret hêz danî ma.”
Kalikê Ocaxê Kureyşanî ra Hamza Takmazî da zanayene ke hedîseyê winasî veê cû zî ameyî kerdene û ganî dewlete tedbîran bigîra.
Kalikê Ocaxê Sinemilli Suleyman Depremî zî dîyar kerd ke çimê elewîyan mal û milkê kesêk de çin o û wina va: “Ma nêwazenî şêrî kuçeyan. Ma nêwazenî bi xirabî cewab bidî nê hêrişan. Ma timî kişta keyeî de yî.”
Aktîvîsta elewî Elif Bakire zî qiseykerdişê xo de wina va: “Heta ke no sîstem wina dewam bikero û heta ke elewîyî sey hemwelatijê diyîn bêrî hesibnayene, ma do timî wina bibî. Ma do peynîya no hedîse vera nêdî.”
Lajê keyeyê Şenalî ra Eren Şenalî zî da zanayene ke paştîdayîşê elewîyan hêz û moral danî înan. ÎZMÎR
