Înîsîyatîfa Heq bi daxuyaniyekê ragihand ku li girtîgehên dewlet tirk herî kêm 780 zarok hene. Înîsiyatîfê da zanîn ku li girtîgehan jî binpêkirinên mezin hene
Înîsiyatîfa Heq têkildarî dayikên ku tevî zarokên xwe li girtîgehên dewleta tirk de girtî ne, bi ser navê ‘Cihê zarokan mala wan e, ne girtîgeh e’ daxuyaniyeke nivîskî bi raya giştî re parve kir. Di daxuyaniyê de hat destnîşankirin ku li gorî daneyên ne fermî, heta meha mijdara 2019’an li girtîgehên dewleta tirk 780 zarok girtî ne.
Di berdewamê de jî înîsiyatîfê diyar kir ku kapasîteya qawîşan 3 qat zêde bûne û ev agahî dan: “Li qawîşên girtîgehan zexta derûnî û lêgerîna bêserûber zêde bûye. Di hevdîtinan de girtiyan diyar kirin ku pirsgirêka germkirina qawîşan heye û di demsala havînê de jî pir germ in. Girtiyan got ku pirsgirêka ava paqij jî heye û nikarin sûdê ji ava paqij bigirin.”
Binpêkirinên li girtîgehan
Daxuyaniya înîsiyatîfê wiha bi dawî bû: “Dîsa girtiyan anîn ziman ku ava germ kêm didin û ji mafên xwe yên hevpar û civakî bêpar tên hiştin. Ji mafê tenduristiyê bêpar dimînin. Girtiyan destnîşan kir ku dema ji bo dermankirinê diçin nexweşxaneyê, bi awayeke kelemçeyî tên dermankirin. Girtiyan daxuyandin ku gardiyan wekî mirovan nêzî wan nabin.” AMED
