Serekkomarê Fransa Macronî pêvînayîşê Erdoganî ra dima qesawetê Tirkîya ard ziwan û va: “La ma nêwazenê xo vîr ra bikê ke kamî û senî vera DAIŞî şer kerd.”
Pêvînayîşê lîderanê DYA û Fransa ra dima çar hetê pêvînayîşî seba ke meseleyî ke Tirkîya NATOyî de ardî meydan çare bikê ameyî têhet. Nê pêvînayîşî ra dima zî ame parekerdene ke nêzelalîyî nêameyî çarekerdene.
Serekkomarê Fransa Emmanuel Macronî yo ke bi vatişê ‘mezgê NATOyî merd’ kewtibi rojeve û Serekê DYA Donald Trump kom bîyî. Macronî pêvînayîşî ra dima beyanat da û Tirkîya rexne kerd ke seba ke NATO vera Yewîya Pawitişê Şarî (YPG) şer biko Tirkîya gef ro NATO waneno û Tirkîya Rûsya ra sîstemê pawitişê hewayî yê S-400î hêrîna. Macronî seba ke Tirkîya sîstemê pawitişî yê hewayî yê endamêkê NATOyî ney ê Rûsya hêrîna nêrazîbîyayîşê xo mojna.
Pêvînayîşî ra dima mabênê Serekkomarê Fransa Emmanuel Macronî, Serekwezîra Almanya Angela Merkel, Serekwezîrê Brîtanyaya Pîle Boris Johnson û Serekkomarê Tirkîya Recep Tayyîp Erdoganî de babeta rojeva Sûrîye ser o kombîyayîşêk ame kerdene. Emmanuel Macronî îfade kerd ke alozîyê Sûrîye yê ke bi dagirkerîya Tirkîya yê vera Rojawanî hîna zêde bîyî têmîyan hema zî zelal nêbîyî. Macronî vat seba ke krîz bêro çarekerdene pêkerd ke xebatî dewam bikê.
Macronî derheqê fikrê lîderanê Almanya û Tirkîya yo ke vat ”pêvînayîş baş bi” de vat ke wezîfeyo verên ê Fransa têkoşînê vera DAIŞî yo. Nê vatişanê Macronî ra yenê famkerdene ke Fransa cewab da gefanê Tirkîya ke wazena YPG sey terorîst bêro qebulkerdene û dagirkerîya Tirkîya yê vera Rojawanî bêro şinasnayene. Macronî da zanayene ke Tirkîya tim babeta ‘qesawetanê asayîşî’ akena û va: “La ganî ma xo vîr ra nêkerê ke kamî vera DAIŞî şer kerd.”
Macronî heman roje de bi beyanatêkê xo zî eşkera kerdibi ke Tirkîya hetkarî dana DAIŞî û ci rê çeteyan erşawena. ANF
