Neyartîya na desthilatî ya Kurdan rê ke sînoran derbas kena rayêke bîne bi hovîya xo ya qedîme Tûtî kerde hedefê xo. Desthilatîya dagirkere û çeteyanê aye 2’yê Kanûne de şarçeya Til Rifate bombevaran kerdî û 8 înan ra tûtî des tenê sivîlî qetil kerdî. Bi vatişêke bîn heqê ciwîyînê tûtanê Kurdan rayêke bîne hetê na dewleta dagirkere û çeteyanê aye ra înan ra ame girotiş û sere de saziya sey ÛNÎCEF’î ke tenê bi vatişê xo yê ‘ma bi na bûyere şok bîyê’ serê mijare girot û heme dewletê serdestî hemverê nê qirkerdişê ke sûcêke şerî yo bêvengîya xo de risya mendî. Dewletê ke hemverê qetilkerdişê tûtan bêveng manenê bi xo hemkarê nê sûcî yê. Bi qasê destanê rayveberanê na desthilatî destê Tramp û Pûtînî bi xo zî bi gune nê heşt tûtan bîyê leyminî û guna destanê înan dalpe dalpe tarîxe bêbextîye nexşnena. Verê çimanê heme dinya de çeqel Trump û çeqel Pûtînî bi xo nê qesasan rê rayîr kerdî a û vernî ro qetlîamanê înan kerdî a.
Ancî rayvistişê serdestanê dinya yê emperyalîstan o bi nameyê NATO’yî zî bi heme awayî dagirkerî û qetlîamanê şirîkê xo rê bêvengîya xo domna û bi hetkarê dagirkerî, talan û qetlîamanê nê şirîkê xo. Beno ke NATO hemverê nê sûcê şerî ke hetê şirîkêke ey ra ameyo kerdişî xo ro bêvengî rûno, beno ke heme saziyê dinya ke xo sey saziyanê heqanê merdimahî mojnenê ra hemverê nê qirkerdişo ke şarê Kurdî ser de yeno pêkardişî bêvengîya xo de qerardarî bê, la go tarîxe merdimahî de na bêvengîya NATO’yî zî, yê dewletê serdestan û heme sazîyê bînan ey dinya zî sey deqêke sîya yê mîyanê çimanê înan de bi ca bibo.
Na desthilatî mîyanê sînoranê xo de zehf qirkerdişî Kurdan ser de pêk ardê û serdestanê dinya bi maskeya ‘meseleya înan a zerrî’ her gamî kerdişanê înan rê destek vecyayê, la dimayê dagirkerdişê Efrînî ame famkerdişî ke NATO zî, rayvebirê dewletê serdestan ke xo ra zehfê înan girêdayeyê NATO’yê zî semedo ke Rochilata Mîyanîne de saxlem ca bigîrê û kedwerîya xo verdewam bikerê go her wext û her ca de paştî bidê heme awayî kerdişan û sûcanê na dewlet e. Loma eyro roc hemverê qirkerdişê ke înan şarçeya Til Rifate de pêk ard û peynîya ey de heşt tûtî ameyî qetilkerdişî zî xo ro kerrî û korî danê ro heta semedo ke berjewendîyê înan zehf têdir estê nê qirkerdişê hemkarê xo mubah zî vînenê.
Helbet tay zehf şarê Kurdî no rewş fam kerdo û zano ke nê dagirkerî qiwetê xo yê pîlî emperyalîstan ra gênê, la muhîm no yo ke şarê Kurdî nê zî bizano ke heta ey yewîtîya xo ya neteweyî nêvirazê go xetereyê dagirker û hemkaranê înan ê emperyalîstan war û şarê înan ser de verdewam bibo. No kar zî kono partî, sazî û dezgeyanê Kurdan ser. Şarê Kurdî rew ra hêvîya yewîtî yo.
Ey kê pay danê serê awankerdişê yewîtî û vernî ro ci gênê partî, sazî û dezgeyî bi xo yê. Halbikaw heqê ti şexs, sazî, dezge û partîyêke çinê yo ke xo vernîya yewîtîya neteweyî ya şarê Kurdî de bikero asteng. Semedê vernîgirotişê ro qetlîaman yewîtî şert a. Rayedarê emperyalîst û dagirkeran eşkenê hemverê şarê ma yewî bê rayedarê ma çi rê nêeşkê hemverê dagirkerîya înan yewîtîya xo awan bikerê! Lazim o ma na perse xo ra bikerê.
