HRE’yê bi daxuyaniyekê ragihand ku hêzên wan li gundê Kefer Nebo yê Şêrewa yê Efrînê çalakî li dar xistin. HRE’yê diyar kir ku di çalakiyê de 7 çete hatin kuştin û 4 çete jî birîndar bûn
Hêzên Rizgariya Efrînê (HRE) bi daxuyaniyekê ragihand ku hêzên wan di 7’ê kanûnê de, di çarçoveya çalakiyên tolhildanê de li herêma Efrînê çalakî pêk anîn.
Di daxuyaniyê de HRE’yê daxuyand ku hêzên wan li herêma Efrînê di çarçoveya çalakiyên tolhildanê de li dijî artêşa tirk a dagirker û çeteyên wê çalakiyek bi bandor li dar xist. HRE’yê kite kitên çalakiyê jî wiha parve kir: “Di 7’ê kanûnê de hêzên me li gundê Kefer Nebo yê Şêrawayê li dijî çeper û stargehên çeteyên koma bi navê Firqat El Hemze çalakiyek pêk anî. Di çalakiya ku hêzên me ketin nava çeperên çeteyan de 7 çete hatin kuştin û 4 jî birîndar bûn. Di çalakiyê de 2 stargeh û çeperek jî hatin rûxandin.”
HRE’yê da zanîn ku piştî çalakiya hêzên wan, artêşa tirk a dagirker û komên çete yên girêdayî wê gundên Meyasê, Zirneîtê û Girê Zirneîtê yên Şêrawayê bi dijwarî topbaran kirin.
