HSD’ê da zanîn ku êrîşên dagirkeriyê yên li dijî Bakur û Rojhilatê Sûriyeyê didomin. HSD’ê diyar kir ku hêzên dagirker amadekariyên êrîşan dikin û êrîşî qadên sivîlan kirin. HSD’ê destnîşan kir ku di êrîşa DAIŞ’ê ya li Dêrazorê de 4 sivîl şehîd bûn
Navenda Ragihandin û Çapemeniyê ya Hêzên Sûriyeya Demokratîk (HSD) encamên roja 60’emîn a berxwedan û şerê li Rojava û Bakur û Rojhilatê Sûriyeyê aşkera kir. HSD’ê da zanîn ku artêşa tirk a dagirker û çeteyên wê di roja 60’emîn de jî êrîşên dagirkeriyê domandin. HSD’ê destnîşan kir ku hêzên dagirker li seranserî herêmê amadekariyên êrîşan didomînin.
Daxuyaniya HSD’ê wiha dom kir:
“ZIRGAN
* Artêşa dagirker û komên çete li gundê Um El Şeîfa bi çekên giran û roketavêjan êrîşî qadên sivîlan kirin. Her wiha herêm bi saetan bi dijwarî hate topbarankirin û tevgera balafirên bêmirov li qadê bênavber berdewam kir.
TIL TEMIR
* Komên çete yên ser bi artêşa dagirker ve li herêma gundê Um El Kêf hewl da êrîşî herêmên sivîlan bikin û dagirkeriya xwe berfireh bikin. Her wiha bi çekên sekvaniyê êrîş kirin.
DÊRAZOR
* Şaneyên veşartî yên DAIŞ’ê yên ku êrîşên dagirkeriyê yên li bakurê Sûriyeyê ji xwe re derfet dîtin, li herêma Dêrezorê jî tevger û êrîşên xwe yên li ser sîvîlan zêde kirin. Di encama êrîşeke teqemenî ya li vê herêmê de 4 sîvîl şehîd bûn.”
