Konseya Ewropa Tirkîya hişyar kerd ke di biranê derheqê elewîyan de ca bîyara û heta serra 2020î wext da ci. Komîteya Delegeyan a ke nameyê Komîteya Wezîran a Konseya Ewropa ser o ameye pêser eşkera kerd ke Tirkîya di birê derheqê elewîyan de nêardî ca û waşt ke nê bêrê caardene
Weqfa Cemî serra 2014î de muracatê Mehkema Heqanê Merdiman a Ewropa (MHME) kerdbi û waşt ke senî ke camîyî, dêrî û sînagogî dayîşê fatureyanê elektîrîkî ra muaf ê ganî cemxaneyî zî bi heman hewayî tira muaf bibê. MHME waştişê Weqfa Cemî sey heqdar dîbî û Tirkîya zî sey sucdar dîbî. Konseye pare kerd ke Tirkîya hema zî na bire nêarde ca û derheqê nînan de peygoşîye kerde.
Mehkeme muracatê derheqê perwerdeyê fermî yê dînî de zî sey heqdar dîbi û Tirkîya zî sey sucdar dîbi. Bira MHME de ame vatene ke her çiqas Tirkîya serra 2018î de zanayîşê derheqê elewîyan de daxîlê mufredatê perwerdeyî kerd û dersê dînî sey dersê niwaştişî kerd zî nê kerdişî seba waştişê elewîyan û MHME kêm ê û tede peygoşîyî estî. Konseya Ewropa heta menga hezîrana 2020î wext da Tirkîya ke nê meseleyî çareser bika û planêkê çareserîye amade bika. Çime-Politika
