Federasyonê Komeleyanê Dêrsimî (DEDEF) seba tepiştişê hunermend Yilmaz Çelîkî eşkerayîyêk daye. Eşkerayîye de ame vatene ke wa hunermendê ma cade bêrê veradayene, hêrişî bêrê vindertene
DEDEFî derheqê tepiştişê hunermendê dêrsimijî Yilmaz Çelîkî de eşkerayîyêk daye. Partîya Demokratîke ya Şaran (HDP), SMF, Partîya Kede (EMEP), Merkezê Cigêrayîşanê Dêrsimî, Komeleya Xozayî ya Munzurî, Komeleya Çewlîgî, Federasyonê Komeleyanê Depe, Komeleya Manekragî, Komeleya Mercanlar û hunermendî Dogan Çelîk, Nesîmî Aday, Songule Bulur, Vedate Aldemîr, Ozan Berbatî, Aydin Yagan, Nurettîn Guleç, Vedat Baran, Enver Çelîk, Ozan Yagan û Şukrane Lîlek Yilmaz tewrê eşkerayîye bîyî.
Hunermend Yilamaz Çelîk wa cade bêro veradayene
Endamê Heyetê Îdareyî yê DEDEFî Hasan Şenî îfade kerd ke bi tepiştişê hunermendan polîtîkaya teda û hişkerdişî ameye xurtkerdene û no suc nîyo ke hunermendî xîret bikê ke kultur, huner, ziwan û bawerîya welatê xo bidê ciwîyayene. Şenî destbendkerdiş û tepiştişê vera hunermendan şermezar kerdî û vat ke hunermend Yilmaz Çelîk cade bêro veradayene. Eşkerayîya ke hetê Şenî ra ameye wendene wina ya:
Hunermendî ziwan, kultur, huner û bawerîya welatê xo danê ciwîyayene
“Tedaya vera hunermendanê dêrsimijan bi Onur Yanardagî dest pêkerd û netîceyê nê tedayan de Ferhat Tunç surgun bi. Mîkaîl Aslan seba îfadedayîşî ame vengdayene, Çayan Demîrel rê seba dokumentfîlmê ci ceza ameye dayene, derheqê Kazim Ozî de tehqîqatêk dayîye destpêkerdene, Şenol Akdag ame tepiştene. 8ê kanûne de zî embazê ma yo hunermend Yilmaz Çelîk ame destbendkerdene. Ma pê şaş nêmanenê ke dosyaya Çelîkî ser o bira nimite esta. Mengan ra nata endamê ma, îdarekarê ma yenê destbendkerdene û tepiştene. Seba ke nê hunermendî tewrê çalakîyanê demokratîkan benê seke kerdişanê îlegalan kenê yenê hesibnayene. Endam û îdarekarê ma ke keyeyê înan, cayê karê înan eşkera yê û îfadedayîş ra xo dûr nêgênê bi operasyonanê sereştişan serê sibayan yenê destbendkerdene.Nê operasyonî mojnenê ke îqtîdar wazeno ke rewşa îstîsnayîye dewam bika û rayaumûmîya demokratîke ser o teda biko. No suc nîyo ke hunermendî ziwan, kultur, huner û bawerîya welatê xo bidê ciwîyayene.
Ma do têkoşînê xo girdêr bikerê
Ma destbendkerdişan, tepiştişan û tedayanê vera hunermendanê ma şermezar kenê. Embazê ma wa cade bêrê veradayene û hêrişê vera nînan bêrê qedînayene.Ma reyna bi hawayêkê xurtî vanê ke ma do têkoşînê xo yê vera tedayan pîl bikerê, xeta xo ya meşrû û heqdare canêverdê û vera tedayan milê xo çewt nêkerê.”
Înîsîyatîfê hunermendan ê dêrsimijan: Ma do deyîranê xo hîna berz vajê
Hetê bînî ra Înîsîyatîfê Hunermendan ê Dêrsimijan vera tepiştişan nêrazîbîyayîşê xo mojna û vat: “Huner û hunermendî nênê hişkerdene. Ma do dewam bikê ke deyîr û kilamanê xo bi vengêkê hîna berzî vajê.”
