Rojnameger û çalakvanên civaka sivîl ên Hewlêrê gotin ku divê hemû partî bersiveke erênî bidin hewldanên KNK’ê yên ji bo yekitiya neteweyî. Welatiyan destnîşan kir ku li her çar parçeyan jî kî ji bo avakirina nava mala kurdan bixebite, karekî pîroz dike
Serdanên Kongreya Neteweyî ya Kurdistanê (KNK) yên li başûrê Kurdistanê di çarçoveya yekitiya neteweyî û lidarxistina Kongreya Neteweyî ya Kurdistanê de didomin. Têkildarî mijarê rojnameger Koçer Elî û çalakvanê civaka sivîl Ehme Emer ji Rojnewsê re axivîn.
Koçer Elî anî ziman ku li her çar parçeyên Kurdistanê, kes yan jî aliyekê ji bo rêxistina nav mala kurdan kar bike, karê herî başe. Elî da zanîn ku bi taybet di rewşa heyî de divê aliyên siyasî bersiveke erênî bidin hewldanên KNK’ê yên ji bo pêkanîna yekitiya neteweyî.
Çalakvanê civaka sivîl Ehmed Emer jî diyar kir ku gelê kurd kengî nêzî yekitiyê bibin, wê demê armancên xwe ewqas hêsantir bidestxistine. Emer mînaka başûrê Kurdistanê da û wiha got: “Ger partiyên kurd ên li Başûr bibin yek, dê bikarin mafên xwe ji Bexdayê bistînin. Pêwîstiya temamiya Kurdistanê bi yekdengî û yekitiya neteweyî heye.” HEWLÊR
