Hemserekê KESKî Mehmet Bozgeyîkî yo ke verê Şaredarîya Pêrî de qisey kerd vat: “Nê dîmenê şaredarîye dîmenanê 12ê Adare û 12ê Êlule ra wetêr ê
Verê Şaredarîya Pêrî ya ke hetê îqtîdarî ra ameye xespkerdene de eşkerayîyêk ameye kerdene. Eşkerayîye de Hemserekê KESKî Mehmet Bozgeyîkî qisey kerd û vat: “Nê dîmenê şaredarîye dîmenanê 12ê Adare û 12ê Êlule ra wetêr ê.
Hemserekê Şaredarîya Pêrî Orhan Çelebî û Songule Dogan, Hemserekê KESKî Mehmet Bozgeyîk, îdarekarê KESKî, temsîkarê partîyan û dezgehan tewrê eşkerayîye bîyî.
Hemserekê Şaredarîya Pêrî Orhan Çelebî vat: “Roja ke îradeyê ma ame xespkerdene ra nata çîyêk nêvurîya. Dormegirewtişê qereqol û asayîşî dewam keno. Şar rê xizmet nêno dayene. Têkoşînê ma yê verba nê xespî 33 rojan ra natê tewir bi tewir dewam keno.”
Hemserekê KESKî Mehmet Bozgeyîkî zî qisey kerd û vat: “Dîmenê verê Şaredarîya Pêrî dîmenanê 21ê Adare û 12ê Êlule ra wetêr ê. Semedê krîzê sîyasî û ekonomîkî bêhuqûqîya blokê AKP-MHPyî yo. Ma sey KESKî polîtîkaya qeyûmî sey darbeyêk îfade kenê. Ganî na polîtîka bêra caverdayene û weçînayeyî abigêrê wezîfeyanê xo.” DÊRSIM
