Vejîya werte ke Rayberê PKKyî Abdullah Ocalanî û hîrê tepişteyanê sîyasîyan yê Îmrali rê 21ê teşrîna verêne de cezayêka newîye ya dîsîplînî ameye dayene. Avûkatanê Ocalanî da zanayene ke ceza yena nimnayene û ê tedeyê ceza nêzanenê
Pêvînayîşê Ocalanî û Omer Hayrî Konar, Hamîlî Yildirim û Veysî Aktaş ê ke heman zindan de yê bi hawayêkê keyfî yenê astengkerdene. Goreyê xebera Ajansê Mezopotamya 21ê teşrîna verêne de Ocalan û hîrê tepişteyî cezaya dîsîplînî girewte.
Avûkatanê Buroyê Huqûqî yê Asirinî îbrahîm Bîlmezî vist vîrî ke 10ê temmuze de îdareyê zindanî cezaya dîsîplînî dabî Ocalanî û tepişteyanê Îmraliyî. Bîlmezî îfade kerd ke dima ke na ceza qedîyaye 21ê teşr3ina verêne de cezayêka newîye ya dîsîplînî înan rê ameye dayene. Goreyê Bîlmezî Ocalanî û tepişteyanê bînan zî îtîrazê cezaya dîsîplînî kerd. Bîlmezî Ajansê Mezopotamya reyde qisey kerd û vat: “Seba ke Birêz Ocalan vîneno nê cezayê dîsîplînî tewirêko sîyasî yê, ey zî tewirêko sîyasî mojna û îtîrazê cezayan kerd.”
Bîlmezî eşkera kerd ke 29ê teşrîna peyêne de o pê cezaya dîsîplînî hesîya û Ocalanî û tepişteyanê bînan îtîrazê cezaya dîsîplînî kerd labelê îtîrazê înan ameyî redkerdene. Cezaya dîsîplînî ya muwekîlanê ci yena nimnayene û naye ra ê nêzanenê ke tedeyê ceza çi yê. Bîlmezî ard ziwan ke cezaya dîsîplînî ya ke seba pêvînayîşanê keye ameye dayene seba pêvînayîşê avûkatan asteng nîya û vat: “Muwekîlê ma yê ke cezaya dîsîplînî înan rê ameye dayene têna nêeşkenê keyeyanê xo bivînê, ceza vera pêvînayîşê avûkatan nîya.” STENBOL
