Endama Desteya Rêveber a TEV-DEM’ê Foza Yûsif di foruma NRLS’ê de axivî û got; ‘Dewleta tirk bi destûra DYA û Rûsyayê êrîşî herêma me kir. Li herêmê paqijiya etnîkî dike û demografyaya herêmê diguherîne. Lê em ê heta dawiyê destkeftiyên xwe biparêzin.’
Navenda Rojava ya Lêkolînên Stratejîk (NRLS) têkildarî êrîşên qirkirina etnîkî yên dewleta tirk û polîtîkayên guhertina demografyaya herêmê yên li dijî Bakur û Rojhilatê Sûriyeyê, forumekê pêk tîne. Forum li avahiya navendî ya Sendîkaya Kedkaran a Rimêlan a Qamişloyê bi rengê sê rûniştinan pêk tê. Endama Desteya Rêveber a TEV-DEM’ê Foza Yûsif di forumê de axivî û rewşa dawî ya li herêmê nirxand.
Foza Yûsif anî ziman ku Bakur û Rojhilatê Sûriyeyê di pêvajoyeke zehmet de ye. Yûsif da zanîn ku dewleta tirk bi destûra hêzên DYA û Rûsyayê dest bi êrîşê kir û li herêmê qirkirina etnîkî dike û demografyaya herêmê diguherîne.
‘Dixwazin pêkhateyên herêmê tune bikin’
Di berdewamê de jî Yûsif diyar kir ku dewleta tirk tevî hemû kiryarên xwe jî bi ser neket û wiha pê de çû: “Hê jî êrîşî herêmê dike. Dewleta tirk bi van êrîşên xwe dixwaze pêkhateyên herêmê tune bike. Dixwaze fitneyê bixe navbera pêkhateyan. Çeteyên DAIŞ’ê bi navê koçberên Sûriyeyî li hev kom kiriye û bi wan êrîşî herêmê dike. Erdogan dixwaze îradeya me têk bibe. Em 8 sal in xwe diparêzin. Em ê heta dawiyê parastina xwe dewam bikin.”
‘Ji bîr nekin ku DYA û Rûsyayê destûr da dewleta tirk’
Herî dawî jî Yûsif ev tişt destnîşan kir: “Gelê me dê tu carî ji bîr nekin ku DYA û Rûsyayê destûr dan Tirkiyeyê ku êrîş bike. Bi navê ol li Serêkaniyê û Girê Spî êrîşî gel dikin. Dewleta tirk gefê li hemû pêkhateyan dixwe. Gelê me dê li ber kiryarên li Serêkaniyê, Girê Spî û Til Rifatê rabe. Divê em şehîdên xwe yên ku ji bo me, ji bo xaka me canê xwe feda kirin nas bikin. Em ê destkeftiyên şehîdan ji kesî re nehêlin. Em ê vê xakê ji dagirkeran biparêzin, li dijî êrîşên dewleta tirk û çeteyên wê li ber xwe bidin û em ê bi ser bikevin. Ger em bibin yek, dê tu hêz nekarin li hemberî me bisekinin.”
Forum dê piştî sê rûniştinan di dema êvarê de bi civîneke çapemeniyê bi dawî bibe. QAMIŞLO
