Dêrsim de temsîlkaranê dezgehan û partîyanê sîyasîyan vera muracatê Partîya Vatanî yo ke seba ke heykelê Seyît Rizayî bêro wedaritene kerd nêrazîbîyayîşê xo mojnayî û vat: “Seyîd Riza vîrê şarî yo. Wazenê ke komel bêvîr bimano.”
Partîya Vatanî Walîtîya Dêrsimî û Şaredarîya Dêrsimî rê muracat kerd ke heykel û nameyê Seyîd Rizayî bêrê wedaritene. Muracatê Parîya Vatanî Dêrsim de rastê zaf nêrazîbîyayîşan ameyî. Temsîlkaranê dezgehan û partîyanê sîyasîyan vat ke ê do vera nê hêrişî vinderê ke vera erjanê Dêrsimî ame kerdene.
No hêriş têna vera Dêrsimî nîyo vera heme Kurdistan o
Wekîlê HDPyî yê Dêrsimî Alîcan Onluyî vat: “Terteleyê Dêrsimî de dewlete meyîtê Seyîd Rizayî rê zî tehamul nêkerd û meyîtê ci meydan ra wedarit. Nika heman zîhnîyet nêeşkeno tehamulê heykelê ci bikê. Nê rojan de ke îdîaya ‘Dewlete Terteleyê Dêrsimî de gazê kîmyewîyî xebitnayî’ Almanya de yena cigêrayene, no muracat ame kerdene. Armancê înan no yo ke bi nê rojdemî wazenê rojdem bivurnê. No hêriş têna vera Dêrsimî nîyo, vera pêro Kurdîstanî yo. Naye ra ganî ma pêro pîya verê ci de vinderê.”
Seyîd Riza erjê komelî yo
Wekîlê CHPyî yê Dêrsimî Polat Şarogluyî vat: “Seyîd Riza erjê komelî yo. Muracatêko winasene têna aramîya komelî xirap keno.”
Wayîrvejîyayîşê Seyîd Rizayî vervindertişê Terteleyê Dêrsimî yo
Serekê EMEPî yê Dêrsimî Ergîn Tekînî vat: “Seyîd Riza seba şarê Dêrsimî sembolêk o û vîr û nasnameyê şarî yo. Wayîrvejîyayîşê Seyîd Rizayî vervindertişê Terteleyê Dêrsimî yo.”
Na partîya provakatîfe nêeşkena erjanê ma ser o qisey bika
Serekê Şubeyê Dêrsimî yê Komeleya Kulturî ya Pîr Sultan Abdalî Alî Ekber Kayayî vat: “No hêriş vera erjanê şarî yo. Na partîya ke bi waştişê provakatîfî têgêrena nêeşkena erjanê ma ser o qisey bika.”
Seyîd Riza seba ma sembol o
Serekê Federasyonê Komeleyanê Dêrsimî Alî Haydar Benî vat: “Ê qebul bikê yan zî nêkê Seyîd Riza rayberêkê şarî yo. O kesêk o ke Terteleyê Dêrsimî de seba waştişanê meşrûyan têgêra. Seyîd Riza seba ma sembol o, vîr o. Wazenê ke vîrê Dêrsimî wedarê.”
Şêx Seîd zî Seyîd Riza zî vîrê şarî yo hempar o
Hemsereka Komeleyanê Elewîyan ê Demokratîkan Selda Guneş vat: “Partîya Vatanî partîyêka sîyasî ney provokatîf a. Verê cû muracat kerd ke heykelê Şêx Seîdî bêro wedaritene nika zî wazenê wa heykelê Seyîd Rizayî bêro wedaritene. Şêx Seîd zî Seyîd Riza zî vîrê şarî yo hempar o. ê wazenê ke komel bêvîr bimano.” DÊRSIM
