Berdevka Komîsyona Mafên Mirovan û Hiqûqê ya HDP’ê Ayşe Acar Başaran daxuyaniyek da û got: “Ji 19’ê kanûnê û vir ve tevî ku 19 sal bi ser re derbas bûne jî li girtîgehên Tirkiyeyê hîn jî mafên mirovan tên binpêkirin. Îşkence û kiryarên li dijî mirovahiyê zêde bûn, li girtîgehan mirov jiyana xwe ji dest didin.”
Berdevka Komîsyona Mafên Mirovan û Hiqûqê ya Partiya Demokratîk a Gelan (HDP) û endama Desteya Rêveberiya Navendî ya HDP’ê Ayşe Acar Başaran bi wesîleya salvegera Komkujiya Girtîgehan a 19’ê Kanûnê daxuyaniyeke nivîskî weşand.
Di daxuyaniyê de ev tişt hatin gotin:
“Di 20’ê cotmeha 2000’î de li Girtîgehên Tirkiyeyê ji bo şermezarkirina bicihanîna sîstema Tîpa F bi sedan girtî û hikûmxwaran bi 19 daxwazan dest bi greva birçîbûnê kirin û beşek ji girtiyan di roja 45’an a çalakiyê de ji ber ku daxwazên wan bêbersiv hatin hiştin dest bi rojiya mirinê kirin.
Hikûmeta wê demê guh neda daxwazên girtiyan. Di sibeha 19’ê kanûnê saet 04:30’î de li 20 girtîgehan di heman demê de operasyonek dest pê kir. Di vê operasyonê de ku jê re ‘Vegera li Jiyanê’ gotin, çekên giran û madeyên kîmyewî ku heta niha nehatine aşkerakirin bê kîjan in, makîneyên kar, helîkopterên şer û bombeyên gazê hatin bikaranîn. Bi rengekî hovane êrîşî girtiyan kirin. Di encama êrîşê a ku bi sedan leşker, polîs, gardiyan û kontrayan pêk hat ede 30 kes hatin qetilkirin û bi sedan kes jî bi giranî birîndar bûn.
Ji 19’ê kanûnê û vir ve tevî ku 19 sal bi ser re derbas bûne jî li girtîgehên Tirkiyeyê hîn jî mafên mirovan tên binpêkirin. Îşkence û kiryarên li dijî mirovahiyê zêde bûn, li girtîgehan mirov jiyana xwe ji dest didin. Ji bo careke din komkujiyên mîna 19’ê Kanûnê rû nedin divê desthilatdariya siyasî û rayedar ji bûyeran dersê werbigirin û dest ji nêzîkatiyên ku li girtîgehan rûmeta mirovan binpê dike berdin.”
