Polîsan parlamentera HDP’ê Remziye Tosun, endamên Meclisa Şaredariya Sûrê û xebatkarên şaredariyê ku dixwestin li ber avahiya şaredariyê çalakî pêk bînin, derb kirin. Tosun jî bertek nîşan da û got; ‘Hûn talanker, diz û rêbir in.’
Polîsên dewleta tirk di serê sibehê de bi ser mala hevşaredara Şaredariya Sûr a Amedê Fîlîz Buluttekîn de girt. Di dema serdegirtinê de polîsan hevjîn û zarokê Buluttekîn ê 10 salî li erdê dirêj kirin û çek xistin serê wan. Di heman demê de polîsan çek xist serê hevşaredar Buluttekîn jî. Li hêla din polîsan avahiya şaredariyê bi wesayîtên zirxî û bariyeran dorpêç kir û li şaredariyê lêgerîn da destpêkirin.
Li ser vê yekê komeke ku ji parlamentera Partiya Demokratîk a Gelan (HDP) a Amedê Remziye Tosun, endamên Meclisa Şaredariya Sûrê û xebatkarên şaredariyê pêk dihat, li ber avahiya şaredariyê kom bûn. Lê polîsan ji bilî xebatkarên şaredariyê, nehişt ku tu kes bikeve avahiya şaredariyê. Li ser hewldana parlamenter Tosun û endamên meclisê, polîsan arîşe derxist. Di vê arîşeyê de polîsan Tosun û endamên meclisê derb kirin.
Piştre jî parlamenter Tosun axivî û bertek nîşanî dorpêçkirina şaredariyê û serdegirtina malan da. Tosun got ku serdegirtina şaredariyê, dizîna îradeya gel e û dê vê hewlê qebûl nekin. Tosun tayînkirina qeyûman weke qanûnê daristanê pênase kir û got; ‘Hûn talanker û rêbir in.’
Herî dawî jî polîsan koma çalakger ji qadê dûrxist. Hat zanîn ku lêgerîn û dorpêça li Sûrê didome. AMED
