Wezîrê Karanê Zereyî Suleyman Soyluyî Amedsporî sey hedefî mojnabi û vatbi: ‘Kulubê sporî yo ke binê talîmatê Kandîlî de yo.’ Derheqê Amedsporî de hetê mufetîşanê wezaretî ra tehqîqatêk yeno kerdene
Amedspor hema zî binê ambargoyê Federasyonê Futbolî yê Tirkîya (TFF) de yo. Wezîrê Karanê Zereyî Suleyman Soyluyî derheqê Amedsporî de vatbi ke ”Kulubê sporî yo ke binê talîmatê Kandîlî de yo.” Nê vatişê Soyluyî ra dima mufetîşanê wezaretî derheqê Amedsporî de dest pê tehqîqatêkî kerd.
Mufetîşî hewteyêk ra nata defteranê Heyetê Îdareyî yê Amedsporî, tabloyanê fînansmanî û butçeyê ci de cigêrayîşê xo dewam kenê.
Wezîrê Karanê Zereyî yê Tirkîya Suleyman Soyluyî 11ê teşrîna peyêne de bi nê qiseyan Amedspor sey hedef mojnabi: “Armanco peyên ê Kandîlî Amedspor o. Bitaybetî Cemîl Bayikî ferman da ke seba Amedsporî pere bêro pêser. Amedspor kulubê sporî yo ke binê talîmatê Kandîlî de yo.”
Serekê Kulubê Amedsporî Metîn Kilavuzî da zanayene ke dima ke raporê tehqîqatî amade bibo ê do eşkerayîyêk bidê. AMED
