Piştî sê rojên rojiyê, civaka êzdî Cejna Êzî pîroz kir. Cejna Êzî ku ji bo civaka êzdî xwedî wateyeke mezin e, li bajarên weke Tirbespiyê, Şehba û Duhokê hat pîrozkirin
Civaka êzdî piştî sê rojên rojiyê îro jî Cejna Êzî pîroz kir. Civaka êzdî piştî 3 rojên rojiyê (Sêşem, çarşem û pêncşem) ji hefteya destpêkê ya meha kanûnê û li gorî salnameya kurmancî Cejna Êzî pîroz dikin. Cejna Êzî weke ‘Cejna Rojiya Mezin’ jî tê zanîn. Di navbera salnameya zayînî û salnameya şerqî de 13 roj ferq heye. Cejna Êzî li cem civaka êzdî xwedî wateyeke mezin e. Di vê çarçoveyê de li bajarên rojava û başûrê Kurdistanê civaka êzdî Cejna Êzî pîroz kir.
Li Tirbespiyê cejn hate pîrozkirin
Şêniyên êzdî yên Tirbespiyeyê Cejna Êzî bi pêkanîna rê û resmên olî pîroz kir. Lê Mala Êzdiyan di roja pêncşemê de daxuyaniyek da û diyar kiribû ku ji bo piştgiriya bi koçberên Bakur û Rojhilatê Sûriyeyê re dê pîrozbahiyan lidar nexin. Ji ber vê yekê jî li Tirbespiyê pîrozbahî nehatin lidarxistin.
Pîrozbahiyên li Şehbayê
Her wiha bi dehan malbatên êzdî û endamên Meclisa Malbatên Şehîdan ên li Kantona Şehbayê, bi boneya Cejna Êzî serdana Goristana Şehîdan a Ehres a Fafîn a Şehbayê kir. Li goristanê êzdiyan kulîlk danîn ser gorên şehîdan. Paşê ji rêveberên Yekitiya Êzdiyan Mûstefa Nebo axivî û Cejna Êzî li tevahiya civaka êzdî û gelê herêmê pîroz kir.
Ji rêveberên Yekitiya Êzdiyan a Kantona Efrînê Silêman Cafer û endamê Meclisa Malbatên Şehîdan Hisên Mûrad jî axivîn. Di axaftinan de Cejna Êzî li tevahiya şêniyan hat pîrozkirin û hêviya aramî û ewlehiyê ji hemû gelan re hate xwestin. Her wiha axaftvanan got ku ew bi hêvî ne li Efrînê vegerin, cejna xwe li warê xwe pîroz bikin û Efrîn ji dewleta tirk a dagirker û çeteyên wê were rizgarkirin.
DUHOK
Yek ji bajarên ku Cejna Êzî lê hat pîrozkirin jî Duhok bû. Mîna her deverê, êzdiyên li Duhokê jî piştî 3 rojên rojiyê, îro Cejna Êzî pîroz kirin. Li hemû deverên ku Cejna Êzî lê hate pîrozkirin, daxwaza rizgarkirina êzdiyên di destê çeteyên DAIŞ’ê de hate kirin.
Hêjayî bibîrxistinê ye ku 7 cejnên êzdiyan ên taybet hene. Cejna Êzî jî yek ji cejnên herî mezine ku tê pîrozkirin.
