Komeleya Şêx Seîdî do gerreyê Partîya Watanî û serekê ci Dogu Perînçekî bikê ke wazenê sembol û nameyê Şêx Seîdî û Seyîd Rizayî bêrê wedaritene
Komeleya Şêx Seîdî vera waştişê Partîya Vatanî ya ke wazena sembol û nameyê Şêx Seîdî û Seyîd Rizayî bêrê wedaritene nêrazîbîyayîşê xo mojna.
Tornê Şêx Seîdî û Serekê Komeleya Şêx Seîdî Kasim Firatî Camîyê Ofîsî de eşkerayîyêke daye û vat: “Ma înan baş şinasnenê. Ê wazenê ke qirkerdişê kurdan dewam biko. Înan bi serran hêrişê ziwan û erjanê kurdan kerd. Ganî ê bizanê ke ma do ziwan û erjanê xo ra fek vera nêdanê.”
Firatî îfade kerd ke Şêx Seîd û Seyîd Riza rûmetê kurdan ê û ê do gerreyê Partîya Vatanî û serekê partîye Dogu Perînçekî bikê. Firatî vat ke ma do vera tedayan milê xo çewt nêkê.
Firat ra dima Serekê Baroyê Amedî yê verên Mehmet Emîn Aktaşî zî qisey kerd û va: “Ewro hema zî nêno zanayene ke gorê Şêx Seîdî û Seyîd Rizayî hê ça de yê. Ma do gerreyê nê kesan bikê ke hêrişê vîr, ziwan û erjanê komelî kenê. Tîya de şar yeno dişmenkerdene, no sucêk o.” AMED
