Komeleya Şêx Seîd têkildarî hewldana provakatîf a Partiya Vatanê ku ji bo rakirina remzên Şêx Seîd û Seyîd Riza serlêdan kiribû, daxuyaniyek da. Komeleyê diyar kir ku dê der barê Partiya Vatanê û serokê wê yê giştî de serlêdana sûc bikin
Partiya Vatanê ji bo nav û sembolên Şêx Seîd û Seyîd Riza li Amed û Dêrsimê bên rakirin, serî li walîtî û şaredariyên her du bajaran dabûn. Li ser vê yekê gelek derdorên cuda bertekên tund nîşan dan û diyar kirin ku ev hewldaneke provakatîfe.
Bi heman boneyê Komeleya Şêx Seîd li ber Mizgefta Ofîsê ya Yenîşehîr a Amedê bi daxuyaniyekê bertek nîşanî van serlêdanan da. Neviyê Şêx Seîd û serokê Komeleya Şêx Seîd Kasim Firat diyar kir ku Partiya Vatanê dixwaze kuştin û qetilkirina kurdan bê berdewamkirin.
Firat destnîşan kir ku kesên ku ziman û hebûna kurdan qebûl nakin, bi salan e êrîşî kurdan kirin û wiha domand: “Ev kes bila bizanin ku em ê ne dev ji zimanê xwe berdin û ne jî nirxên xwe berdin. Em ê têkildarî Partiya Vatanê û serokê wê yê giştî dê serlêdana sûc bikin. Divê bê zanîn ku em ê serî li ber zextan nedanîn.” AMED
