Pêngava jinên ereb ên Reqa, Tebqa, Dêrazor û Minbicê ku bi dirûşma ‘Em bûn yek, bi ser ketin, em ê li ber xwe bidin ji bo ku xwe biparêzin’ dabû destpêkirin bi dawî bû. endama rêveber a Rêveberiya Jin a Reqayê Xelîxe Ebdî diyar kir ku wan rûyê rasteqîn ê dagirkeriyê raxist ber çavan û jinên ereb karîn dengê xwe bilind bikin û serî hil din
Dewleta tirk a dagirker û çeteyên wê êrîşên dagirkerî û qirkirinê yên li dijî Rojava û Bakur û Rojhilatê Sûriyeyê didomînin. Li dijî van êrîşan, rêveberiyên jin ên herêmên Reqa, Tebqa, Dêrazor û Minbicê di 23’yê tîrmehê de bi dirûşma ‘Em bûn yek, biserketin, em ê li berxwe bidin ji bo ku xwe biparêzin’ pêngavek da destpêkirin. Di vê çarçoveyê de gelek jinên ji herêmên Bakur û Rojhilatê Sûriyeyê tev li pêngavê bûn.
Bi berdewam kirina êrîşên re jinan di 19’ê îlonê de vêcarê bi dirûşma ‘Dagirkerî tundî ye, bi berxwedana Hevrînê em ê dagirkerî û faşîzmê hilweşînin’ pêngav hate domandin. Pêngav di 18’ê kanûnê de bi dawî bû. Tevahiya jinên Bakur û Rojhilatê Sûriyeyê tev li pêngavê bûn û li hemberî artêşa tirk a dagirker serî hildan. Jinan destnîşan kirin ku ew binpêkirinên hovane yên li dijî herêmê qebûl nakin.
‘Pêngav bi ser ket’
Têkildarî pêngavê endama rêveber a Rêveberiya Jin a Reqayê Xelîxe Ebdî ji ANHA’yê re axivî û wiha got: “Pêngav bi ser ket. Pêngavê li hundir û derveyî Sûriyeyê deng veda. Me hewl da bi rêya çalakiyên xwe rûyê rasteqîn ê dagirkeriyê yê li Bakur û Rojhilatê Sûriyeyê raxist ber çavan. Her wiha me bal kişand ser tundiya dagirkeran a li ser jinê û kiryarên çeteyên DAIŞ’ê.”
‘Jinên karîn dengê xwe bilind bikin’
Herî dawî jî Zehîxe Ebdî ev tişt anî ziman: “Jinên ereb karîn dengê xwe bilind bikin, li dijî gefên dewleta tirk serî hil din û piştgiriya xwe ya bi HSD’ê û girêdana xwe ya bi xaka xwe re bînin ziman. Jin li Bakur û Rojhilatê Sûriyeyê li aştiyê digere. Armanc dike aloziya Sûriyeyê bi rêya diyaloga sûrî-sûrî çareser bibe.” REQA
