Parytîya HDP weçînayîşê 31 Edare de 65 şaredarîyî qezenc kerdê. Semedo ke 6 serekê şaredarîyan bi KHKyan gure ra îxrac bîybê, destnabi mazbataya înan ser. Ewta de zî bi temam yew politikaya keyfî esas girîyaya. Nê şeş şaredarîyan semedo ke bêrê weçînayîş, murecaatê Heyetê Weçînayîşê Berzî kerdbi. Heyetê Weçînayîçê Berzî zî derheqê înan de yew persîyarî kerda. Peynîya na persîyarî de, nê namzetan beştarbîyayîşê weçînayîşê heq kerdo. Û nê 6 namzetê dekewtê weçînayîş û bi epey yew ferqê rayan, weçînayîş qezenc kerd. Dima wexto ke sira amey dayîşê mazbata, Wezîrê Karê Zerrîyî, KHK reyra îxracbîyayîş behane kerd û destna mazbataya nê şaredaran ser. Ewta de bi temam keyfî yew mûamele esto. Yanî vanê ke; “Ma dewlet î, ma se bikê/bikerê ma bi heq î.” Çi heyf ke nê merdimî, qanûnê xo zî dekenê binê payan. Ay wext ma zî persenê; şima çirê verrnî de, yanî weçînayîş ra ver/vîyar namzeteya nê şaredaran qebul kerde? Çirê şima vernî de manî nêbîyê? Weçînayîşê 31ê Edare 2019î ra pey rayna 31 şaredarîyan rê şima qeyyimî tayîn kerdê. Wezîrê Karê Zerreyî, bi KHKyan 23 hemserekê nê şaredarîyan tewiştê dekerdê zîndanan. Nê şaredaran ser o çîyo ke tesbît bîyo çin o. Yanî goreyê qanûnanê Tirkîya, yew sucê nê şaredaran çin o. Seba tewiştişê/tepîştişê înan yew qerarê mehkemeyan çin o. Kor topal yew qanûnê înan esto, la nê qanûnî zî dekenê binê payan.
Goreyê Qanûnê Bingeyî; eke şaredar, encümen yan zî endamê meclîsî, wexto ke persîyarî ra vêreno, Wezîrê Karê Zerreyî, şîyno yew deme înan gure ra bigêro. Û herinda înan de, meclîsê şaredarî, xo mîyan de, rayna yew deme şîyno wekaleten xo mîyan ra yew merdimi tayin biko /bikero. Persîyarî ra pey, eke suc tesbît bibo; Daniştay bind ra şîyna nê merdiman gure ra bigêro. Aseno ke Qanûnê Qeyyiman goreyê Qanûnê Bingeyê nêvirazîyayo.
Yewna het ra zî KHKyê OHALî ardo Qanûnê Beledîyan ra dusnayo. Ewta de zî yew bêqanûney esta. Qanûnê Bingeyî de; KHKyê OHALî, Qnûnê Beledîyeyan ra düsnayîş, nîyno qebulkerdiş. Şima bi KHKyê OHALî, hem Qanûnê Bingeyî û hem zî Qanunê Beledîyeyan baypas kerdo. Wezîrê Karê Zerrîyî, bi KHKyan, şaredaran gure ra gêno. Raşta ey hinê weçînayîş zî bêmana mendo. Ewta de demokrasi çin o, heq huqûq çin o. Yewna het ra îradeyê şarê ma dekerdo binê payan. Nê şaredarî; bi rayanê şarê ma ameyê weçînayîş. Bi temsîlîyetê şarê ma, şaredarîyan îdare kenê. Şareadarê ma, goya semedo ke “Persîyarîya Terorî ra vêrenê” gure ra ameyê girewtiş. Şarê ma, na rind zano ke, binê nê edebîyatê terorî zî veng o. Na zî ma rind zanê ke semedo ke nê şaredarî kurd î û semedo ke xo kurd hesibnenê, gure ra ameyê girewtiş. Eke no tesbît, yan vate raşt nîyo se, şima çire Qnûnê xo de, kurdî û ziwanê kurdan qebul nêkenê? Ez zewta de rayna vaja, eke şima qanûnanê xo de, kurdî û ziwanê kurdan qebul bikerdnî, hetê demokrasi ra yew akerdiş bikerdnê; ne mesleya kurdan mendnî ne zî şima nê şaredarê ma gure ra girewtnê. Dinya zî zana, şima zî zanê ke kurdî estê. Şima no husus de yew akerdiş bikerdnê, hem şaranê Tirkîya yew nefes girewtnê, hem zî Tirkîye de qrîzî ekonomîyî nêvejîyaynê. Şima kurdan, tena qalan de qebul kenê. Binge de politikaya înkar û îmhayî dewam kena. Tirkîye de, sebebê heme meseleyan, na politikaya înkarî ya. Gure ra girewtişê şaredaran zî politikaya înkarî ra yeno meydan.
Bi KHKyan, gure ra girewtişê şaredaran xeyrê qanûnî yo. Xora pratik de politikaya qeyyiman iflas kerda. 2014 ra pey zî şima qeyyimî tayîn kerdbê. Şima bi weçînayîşê 31ê Edare 2019î cewabê xo girewtbi. Rayna zî yew weçînayîş bibo, şima ko rayna yew hezîmeto pîl veynê. Şima welatê kurdan de, ancax bi zorê dewlete payra vindenê. Şima welatê ma de, siyaseten qedîyayê. Xora şima ekonomîyê Tirkîya zî felç kerdo. Hinê yew hîkayeyê şima yo newe nêmendo. Hêvîya şarê ma û şaranê Tirkîya bi şima nêmenda. Yew vatişê ma verînan esto, vanê ke; “Muş çende here bikeno, ende fîyneno xo ser/sîyar. Şima çende zilm bikê/bikerê, ende şima emre xo kilm kenê.
