Serekê Komeleya Şêx Seîdî Kasim Firatî derheqê muracatê Partîya Vatanî ya ke wazena name û heykelê Şêx Seîdî û Seyîd Rizayî bêrê wedaritene de qisey kerd û vat ke ganî kurdî vera nê hêrişan bi ‘yewîye’ cewab bidê
Vera muracatê Partîya Vatanî ya ke wazena name û sembolê Şêx Seîdî û Seyîd Rizayî bêrê wedaritene nêrazîbîyayîşî dewam kenê. Tornê Şêx Seîdî û Serekê Komeleya Şêx Seîdî Kasim Firatî derheqê babete de Ajansê Mezopotamya reyde qisey kerd. Firatî vist vîrî ke nê hêrişê Partîya Vatanî vera pêro erjanê kurdan yeno kerdene û no muracat dewamê qirkerdişê kurdan o.
Firatî vat: “Perînçek merdimê qesre yo. Mesaj erşaweno qesre. Ma nînan rê vanê ke şima bi înkarî, kiştişî nêeşkenê biresê cayêk.Ganî no nêzdîbîyayîş bêro caverdayene. Nê kesê ke armnacê înan têna çinkerdişê kurdan o wa baş bizanê ke kurdan çirey peyser game nêeşte û do nêerzê. Kurdî nêqêdîyayî û do tim bibê. Şêx Seîd û Seyîd Riza rûmetê ma yê. Nê kerdişê Partîya Vatanî çimê ma de Seyîd Riza û Şêx Seîd hîna kenê pîl.
Çar parçeyanê Kurdîstanî de kurdî yenê qetilkerdene, cenazeyê înan nênê dayene. Erjê înan yenê binpaykerdene. Ganî vera nê kesanê ke hêrişê erjanê kurdan kenê bi yewîye cewab bêro dayene. Ewro ma hema nêzanenê ke gorê Seyîd Rizayî û Şêx Seîdî ça de yê. Ma do gerreyê Partîya Vatanî bikê. Çunke hêrişê vîr, ziwan û erjê şarî kena.” AMED
