Muzîkvanê kolanan Hisên Qulîzade ji rojhilatê Kurdistanê ye. Qulîzade rojane li kolanên Silêmaniyeyê bi sêtara xwe bi kurdî û farisî distrê. Qulîzade hewl dide ku bi mamosteyên muzîkê re bixebite û bêhtir hînî muzîka kurdî bibe
Hisên Qulîzade ku 38 salî ye, ji rojhilatê Kurdistanê ye û muzîkvanekî kolanan e. Hesen mehek berê bi sedema ku li Îranê heqaret li muzîkvanên kolanan tê kirin û wan dixin zindanan, berê xwe da başûrê Kurdistanê. Qulîzade li Silêmaniyeyê bi cih bû.
Qulîzade bi roj li ber Baxê Giştî û bi şev jî li cadeya Seholeke ya Silêmaniyeyê bi amûra xwe ya bi navê sêtar awazên xwe yên kurdî û farisî distrê. Qulîzade gelê Silêmaniyeyê jî weke ‘hunerdost’ pênase dike û keyfxweşiya xwe tîne ziman. Qulîzade têkildarî mijarê ji Rojnewsê bi Berhem Letîf re axivî.
Muzîkvan Qulîzade dibêje ku ev 25 sal e bi muzîkê re mijûl dibe û 4 sal in jî vê hunera xwe li kolanan didomîne. Qulîzade wiha domand: “Li Îranê hunermendên wekî me yên entrûmentalîst pir rastî heqaretan tên. Tên girtin û sewqî dadgehan tên kirin.”
Stranên hunermendên kurd distre
Tevî sêtarê, Qulîzade her wiha li keman û tarê jî dide. Rojane 4 heta 5 saetan li kolanên Silêmaniyeyê li sêtarê dide. Piraniya stranên ku Qulîzade distrê jî yên Hesen Zîrek, Mihemed Mamlê, Nasir Rezazî, Mezherî Xaliqî û car caran jî awazên hunermendên rojavayê Kurdistanê ne.
Dixwazî hînî muzîka kurdî bibe
Herî dawî jî Hisên Qulîzade wiha dibêje: “Dema hatim Silêmaniyeyê tu kom û saziyên hunerî ji bo min pêşniyar nekirin. Dixwazim sala tê li cem çend mamosteyan bixebitim û hîn bêhtir hînî muzîka kurdî bibim.” SILÊMANIYE
