Gazî Muratogluyo ke Zîndanê Tarsûsî de tepişteyo dîyar kerd ke rayîrberîya zîndanî bi nê vatişan ‘şima cuye heq nêkenî’ înan tehdît kerde
Gazî Muratoglu Zîndanê Hûmara 1. yê Tarsûsî de tepişte yo. Muratoglu 18ê kanûne de zîndan de dayîka xo reyde pêvînayîş pê ard û dayîka xo rê qala binpaykerdişê heqan ê ke raştê înan yenî kerd. Muratoglu da zanayene ke tedawîya hepsîyanê nêweşan nîna kerdene û taybet sewqkerdişê nêweşxaneyî ê hepsîyanê nêweşan Nesîp Yapici û Mustafa Abî nîno kerdene.
Muratoglu qalîkerdişê xo yê pêvînayîşî de wina va: “Ma 20 hepsî kwişêk de manenî. Labelê werdê 10 kesan dîyeno ma. Wexto ke rayîrberîya zîndanî rê qala problem yenî kerdene cewabê winasî dana ‘Şima PKKyî yî. Eke ma biwazî ma eşkenî her çî bikerî. Şima cuye heq nêkenî.’ Hepsîyê nêweş ê extîyar badê pêvînayîşî bi saetan qorîdor de pay ser de yenî vindetene. Aktîvîteyê ma bi temamî ameyî qedexekerdene. Eşyayê ke bi kargo yenî teslîmê ma nînê kerdene. Çîyê ke kantîn de yenî rotene xeylê vaye yî. Coka ra ma nêeşkenî lazimîyanê xo bîyarî ca. Îşkenceyêko sîstemantîk dewam keno. Çîyê ke hetê psîkolojî de ganî nêrî kerdene bi ma yenî kerdene. Personelî qorîdor û hûmartijan de heqarert bi hepsîyan kenî.”
Paştîdayîşê huqûqî waşte
Dayîke Hanim Muratogluya ke di domanê aye zîndan de yî vera nê binpaykerdişê heqan de muracatê Şûbeyê Mêrsînî yê Komeleya Heqê Merdiman (ÎHD) daye û paştîdayîşê huqûqî waşte. MÊRSÎN
